Têkildarî mîtînga ‘Azadî ji bo Aştiyê’ ku wê di 8’ê Sibatê de li Amedê li Qada Stasyonê bê lidarxistin, Komîteya Amadekar li avahiya bajarê Amedê ya Partiya Demokrasî û Wekheviyê ya Gelan (DEM Partî) daxuyaniyek da.
Hevserokê DEM Partiyê yê bajêr Abbas Şahîn got, “Gel ji bo aştiyeke bi rûmet divê êdîo bi hev re tevbigere. Ev pirsgirêk gihîştiye wê astê ku xweragirtin êdî lê nabe. Pirsgirêkên ku sed sal in komî ser hev bûn û bûne kangren divê êdî bêne çareserkirin.”
Şahîn got, “Ji bo çareseriya demokratîk a pirsgirêka Kurd divê di nava şert û mercên wekhev de danûstandin bêne kirin. Ev şert û merc divê bêne afirandin. Bi dirûşma ‘Azadî ji bo Aştiyê’ em ê li Amedê mîtîngekê lidar bixin. Li Amedê jî ji bo şert û mercên aştiyê bêne afirandin divê gelê me kar bike. Ji bo mîtînga ku em ê di 8’ê Sibatê de pêk bînin em bang li gelê xwe dikin ku hem tevlî mîtîngê bibe hem jî kar bike. Em bi hev re azadî û aştiyê pêk bînin.”
Şahîn destnîşan kir ku di mîtîngê de wê peyamên têkildarî çareseriyê bêne dayin.
‘DIVÊ BERXWEDAN ÊDÎ BIGIHÊJE AZADIYÊ’
Hevseroka Bajarê Amedê ya Partiya Herêman a Demokratîk (DBP) Sûltan Yaray destnîşan kir ku berxwedana gelê Kurd a ji bo aştiyê tê meşandin divê êdî bigihêje azadiyê û got, “Mîna ku doh li Esenyûrtê bû, em ê li Amedê jî mîtîngê bikin. Neçareserkirina pirsgirêka Kurd ne tenê pirsgirêka gelê Kurd e, pirsgirêka tevahiya Tirkiyeyê ye. Weke ku hûn jî zanin Kurdan her tim dengê xwe ji bo aştiyê bilind kirine. Em dixwazin li Kurdistanê û Rojhilata Navîn aştiyeke mayinde pêk were. Li dijî bendên li pêşiya aştiyê em dest bidin hev û aştiyê pêk bînin. Bila girtîgeh bi aştîxwazan tijî nebe. Ji ber vê yekê jî di 8’ê Sibatê de li Qada Stasyonê em dengê xwe bigihînin tevahiya cîhanê. Em bang li gelê xwe dikin ku tevlî mîtîngê bibe.”
