Komxebata ku li Salona Dawetê ya Çiraganê ya li navçeya Rêya Armûşê destpê kir, wê 2 rojan dewam bike.
Endamê Komîteya Amadekar a Komxebatê Heval Dilbahar di destpêka civînê de axivî û anî ziman ku ew vê çalakiyê diyarî Rêber Apo û şehîdên Tevgera Azadiyê ya Kurdistanê dikin.
Heval Dilbahar gotina “Ziman ji bo neteweyekê ji av û nan bêhtir girîng e” ya Rêber Apo bi bîr xist û destnîşan kir ku zimanê dayikê ji bo pêşketina civakî bingeh e.
Heval Dilbahar girîngiya statuya fermî ya ji bo Kurdî destnîşan kir û got, “Em zanin ku heta statuya Kurdî neyê naskirin, heta ku bi Kurdî perwerdeya bi zimanê dayikê neyê dayin ne aştî pêk tê, ne jî aramî. Ji ber vê jî Kurdî ji bo me xeta sor e.”
Heval Dilbahar ragihand ku armanc ji komxebatê avakirina mekanîzma û stratejiyên mayinde ji bo Kurdî ye û got, “Em niha li pêşberî Kurdî di pozîsyona rexnegirtinê de ne. Eger îro li her qada jiyanê polîtîkayên asîmîlasyonê hebin, di vir de para me jî heye. Ev komxebata me jî ji ber vê yekê destpê dike. Bi vî karî wê stratejî û karê têkildarî Kurdî bêne destnîşankirin.”
Di rûniştina destpêkê ya komxebatê de saziyên cuda yên ziman pêşkêşî kirin. Bername wê bi pêşkêşiya çar komîteyan dewam bike.
