Koma muzîkê Kom Ciwan bi navê ‘Çiyayên Ronî’ albûmeke nû weşand. Mizgîn Zerdeşt destpêkê işaret bi armanca avakirina Kom Ciwan kir û got, di demekê de ku huner bi giranî ketiye bi bandora berjewendiyên sermayedariyê, kom ji bo afirandina hunera azad, xweser û civakî ava bûye.
Li ser lêkirina navê ‘Çiyayên Ronî’ ya li albûmê Mizgîn Zerdeşt anî ziman ku çiyayên Kurdistanê di herikîna dîrokê de rastiya gelê Kurd, çand, jiyan û berxwedana wê vehewandiye û got, “Kom Ciwan jî dixwaze bibe dengê van nirxand. Bi rêya hunerê dilsoziya xwe ya bi welêt û mîrateya çandî zindî dihêle.”
Li gorî gotinên Mizgîn Zerdeşt albûma ‘Çiyayên Ronî’ bi taybetî ji bo bîranîna şehîd Çiya Rizgar û şehîd Ronî Baz hatiye amadekirin û strana destpêkê jî bi navê ‘Çiyayên Ronî’ ye.
Albûm her wiha girîngiyeke taybet dide dengbêjiyê. Mizgîn Zerdeşt diyar kir ku dengbêjî yek ji nirxên herî girîng ên dîrokî û çandî yên gelê Kurd e û di parastina bîranîn, hest û hebûna gel de roleke mezin lîstiye. Wê destnîşan kir ku stranên dengbêjiyê, ji Mem û Zînê heta Derwêş û Edûlê, parçeyên dîrok û hebûna civaka Kurd vedihewîne.
Di nav stranên albûmê de ‘Xwedawendên Helebê’ bi taybetî balê dikişîne ser berxwedana jin û ciwanên li Helebê. Ev stran di dema şerê Helebê de hatiye nivîsandin û bi bîranîna berxwedana jinên leheng, ji Xwedawendên kevnar ên Mezopotamyayê heta jinên têkoşer ên serdema nû, hatiye amadekirin.
Strana ‘De Rabe’ jî behsa berxwedana bajarên Bakurê Kurdistanê dike. Ev stran bi zimanê ciwantiyê banga berxwedanê û hêviya serketinê dide pêş û bîranîna ciwanên ku di rêya azadiyê de jiyana xwe dane zindî dihêle.
Di strana ‘Gerdûn’ de jî dîrok û rola jinên pêşeng tê pêşxistin. Mizgîn Zerdeşt diyar kir ku bi vê stranê dixwazin cihê jinên ku di dîrokê de bûne çavkaniya jiyanê, hunerê û azadiyê nîşan bidin û nav û bîranîna wan di dîrokê de zindî bihêlin.
Strana ‘Leyla Şaylemez û Şehîd Baran Mawa’ jî di albûmê de cih digire. Ev stran ji aliyê ciwanan ve hatiye nûjenkirin û wekî bîranîna her du kesayetiyên ku ji bo ciwanên Kurdistanê sembola têkoşîn û azadiyê ne hatiye hilbijartin.
Mizgîn Zerdeşt anî ziman u armanca Kom Ciwan bi derxistina vê albûmê bi dawî nabe. Wê bal kişand ser girîngiya parastin û zindîkirina nirxên çandî li hemberî guhertinên ku di çand û sosyolojiya civakan de çêdibin. Li gorî wê, huner divê xwe ji dogmayên ku pergala sermayedariyê çêdike rizgar bike û li ser bingeha hest, afirînerî û nirxên civakê were pêşxistin.
Mizgîn Zerdeşt diyar kir ku Kom Ciwan dixwaze hunera azad û xweser a ku ji bo civakê, bi taybetî jinên ciwan û ciwanan, tê hilberandin bi pêş bixe. Wê her wiha got, armanca herî mezin a komê ew e ku bibe maleke hevpar ji bo hemû ciwanên ku xwe di hunerê de dibînin.
Albûma ‘Çiyayên Ronî’ bi heft stranan, weke gava yekem a vê lêgerîna hunerî, ji bo zindîkirina hestên civakî, çandî û dîrokî û veguhastina wan ji nifşekî bo nifşên din derdikeve pêş.
