Bi boneya Roja Dayikan li gelek bajaran di serî de li Amed, Sêrt, Riha, Şirnex û Mêrdînê çalakî hatin lidarxistin.
AMED
Bi pêşengiya Tevgera Jinên Azad (TJA) li navçeya Yenîşehîrê ya Amedê li qada Fîdanlîk çalakiya Roja Dayikan hate lidarxistin. Gelek jin tevlî çalakiyê bûn. Di çalakiyê de pankartên bi nivîsa “Diyariya herî xweş a ji bo dayîkan aştî ye” û “Roja dayîkan pîroz be” hatin hilgirtin.
Çigdem Kiliçgun Ûçar di çalakiyê de yekem axivî û axaftina xwe bi pîrozkirina Roja Dayikan dest pê kir. Çigdem Kiliçgun got, “Em ê ezmûn û zanîna dayikên xwe bi xwe re bibin û em ê bi hevalên xwe yên jin ên ciwan re aştiya herî xurt ava bikin. Niha dem dema têkoşîn û serketinê ye.”
Muruvet Demir jî li ser navê Dayikên Aştiyê axivî û roja dayikên ku zarokên wan jiyana xwe ji dest dane pîroz kir û got ku ew hêvî dikin ku ev pêvajo bibe pêvajoyek aştiyê. Muruvet Demir bang li her kesî kir ku ji bo vê pêvajoyê ji her tiştî bêtir bikin.
Çalakî bi axaftin û govendê bi dawî bû.
SÊRT
Bi munasebeta Roja Dayikan, li qeraxa Çemê Başûr çalakiyek hate lidarxistin. Hevşaredara Şaredariya Sêrtê Sofya Alagaş, Hevşaredara Şaredariya Kurtalanê Sadiye Aktin, Hevşaredara Bajarê Veyselkaraniyê Berfîn Evren, Hevşaredara Bajêr a DEM Partiyê Rahşan Arslan, Hevşaredara Bajêr a DBP’ê Naze Bulga û endamên meclîsa bajêr beşdar bûn.
RIHA
Meclîsa Dayikên Aştiyê ya Rihayê, Tevgera Jinên Azad (TJA) li gundê Amara yê navçeya Xelfetî ya Rihayê, gundê Rêber Apo, ji bo Roja Dayikan daxuyaniyek çapemeniyê li dar xist. Dayik li baxçeyê mala ku Rêber Apo lê ji dayik bûye kom bûn û pankartek bi nivîsa “Diyariya herî baş a ku ji dayikan re were dayîn aştî ye” vekirin. Hevberdevka Komîsyona Hiqûqê ya Partiya Wekhevî û Demokrasiyê ya Gelan (DEM Partî) Sevda Çelîk Ozbîngol, birayê Rêber Apo Mehmet Ocalan û parlamentera Rihayê Dîlan Kunt Ayan beşdarî daxuyaniyê bûn.
Jinan li vir diyar kirin ku ew dixwazin aştî were û gotin bila dewlet gavê biavêje.
Daxuyanî bi çepik û dirûşmeyên wekî “Şehîd Namirin”, “Bê Serok Jiyan Nabe”, “Bijî Serok Apo” bi dawî bû.
ŞIRNEX
TJA’yê li bajarokê Gundikêmelê ya Şirnexê çalakiyekî bi sernavê “Dayik qala aştiyê dikin” li dar xist. Endama TJA’yê Adalet Çîmen Fîdan di çalakiyê de axivî û wiha got: “Dayik her tim di gotin, têkoşîna û pratîka xwe de aştiyê anîn ser ziman. Diyariya herî mezin a ji bo dayikan aştî ye.
Endama Meclîsa Dayikên Aştiyê Asya Tay jî wiha got: “Dayik bi parastina ziman û çanda xwe bûn lêgerînvanên herî mezin a têkoşîna azadiyê. Ji ber vê yekê niha zêdetir erk dikeve ser mile dayikan. Em ê bi hev re ji bo aştiyê têbikoşin û aştiyê bînin.”
MÊRDÎN
Li Mêrdînê Endamên Meclîsa Dayikên Aştiyê û aktivîstên TJA’yê li Avaspî ya navçeya Nisêbînê li hev civiyan. Dayika Aştiyê Halîme Kaya diyar kir ku hesreta hemû dayikên dilşewat aştî ye û bal kişans ser banga Rêber Apo û daxuyaniya kongreyê ya PKK’ê. Halîme Kaya destnîşankir ku ew ê di têkoşîna aştiyê de bi israr bin.
