Li Stenbol û Enqereyê ji bo bal bikişînin ser rewşa girtiyên nexweş çalakiyên heftana yên ji bo girtiyên nexweş hatin lidarxistin.
STENBOL
Komîsyona Girtîgehan a Şaxa Komeleya Mafên Mirovan (ÎHD) a Stenbolê çalakiya “Rûniştina Fyê” ya 758’emîn a du hefteyan carekê tê pêkanîn, li pêşiya avahiya komeleya xwe ya li navçeya Beyoglûyê li dar xist. Aktivîstên mafên mirovan, malbatên girtiyan û nûnerên rêxistinên siyasî û sivîl tev li çalakiyê bûn. Parêzvanên mafên mirovan di çalakiya vê hefteyê de bal kişandin ser rewşa girtiyê nexweş Huseyîn Bîlecan ê ku hê jî di Girtîgeha Sîncanê Hejmar 2yemîn de tê ragirtin. Di çalakiyê de pankertên “Dermankirin maf e, nayê astengkirin” û “Bila girtiyê nexweş Huseyîn Bîlecan bê berdan” hatin vekirin û wêneyên girtiyên nexweş hatin hilgirtin.
Metna daxuyaniyê ji aliyê endamê ÎHD a Stenbolê Nazim Dîkbaş ve hat xwendin.
Nazim Dîkbaş anî ziman ku ew di hefteya 758’emîn de rewşa Huseyîn Bîlecan ê ku hê jî di Girtîgeha Sîncanê Hejmar 2’yemîn de tê ragirtin, parve dikin û wiha got: “Huseyîn Bîlecan ev 32 sal û 9 meh in girtî ye. Nexweşiyên dil, tansiyon, berfirehbûna demarê aort, embolisiya gûrçik, fitiq heye û wekî din jî nexweşiyên din jî hene. Huseyîn Bîlecan nikare bi awayekî rehet bêhnê bistîne. Tevahî van nexweşiyan jî bi kelemçeyê tên tedawîkirin. Li gorî agahiyên xizmên van daye Huseyîn Bîlecan ji ber nexweşiyên xwe ji Girtîgeha Kirşehîr a Tîpa Syê sewqî Girtîgeha Sîncanê Hejmar 2yemîn hatiye kirin. Bijîşk ji malbatê re gotibûn ku ji bo fitiq û safrayê divê Huseyîn emaliyat bibe. Lê ji ber rewşa wî divê li nexweşxaneyê were tedawîkirin. Lê tenê ji girtîgehekî din sewqî girtîgekî din kirin. Huseyîn Bîlecan di sala 2024an de înfaza xwe bi dawî kir. Lê ji aliyê Lijneya Îdare û Çavdêriyê nehat berdan. Herî dawî lijne di 24ê Îlonê kom bû û berdana Huseyîn 3 meh din jî taloq kir. Divê Huseyîn Bîlecan demildest were berdan.”
Piştî xwendina daxuyaniyê çalakî bi dawî bû.
ENQERE
Înisiyatîfa ji Girtiyên Nexweş re Azadî, di hefteya 630’yî a çalakiya xwe de li Kolana Sakaryayê ya navçeya Çankayayê ya Enqereyê daxuyanî da. Endamên înisiyatîfê û Şaxa Komeleya Mafên Mirovan (ÎHD) a Enqereyê û parastvanên mafên mirovan beşdarî daxuyaniyê bûn. Di daxuyaniyê de pankarta “Dermankirin maf e nayê astengkirin, girtiyên nexweş demildest berdin” hate rakirin. Beriya daxuyaniyê girsê dirûşmeyên “Ji girtiyên nexweş re azadî” û “Tecrîd îşkenceyê bila bi dawî bibe” berz kir. Di daxuyaniya vî hefteyê de bal kişandin ser rewşa girtiyê nexweş Hamdullah Aydemîr ku sedî ji 92 astengdar e û di Girtîgeha Tîpa T a Girtî ya Erdîşê de tê ragirtin.
Metna daxuyaniyê ji aliyê Rêveberê Şaxa ÎHDê ya Enqereyê Bariş Barişik ve hat xwendin.
Bariş Barişik bi lêv kir ku beriya sala 2015an bikeve girtîgehê tu nexweşiyên Hamdullah Aydemîr tunebûye lê piştî ketiye girtîgehê nexweşî lê peyda bûnê û wiha qal kir: “Di sala 2019an de pirsgirêka wî ya îdrarê derketiyê lê ji ber ku tedawiya wî di wextê de nehatiyê kirin pênçeşêra mesenê derbasî merhaleyeke din bûye. Di sala 2023yan de ji bo tomurê ameliyat derbas kirine lê tomur nehatiyê paqîjkirin. Ji ber nexweşiyên giran înfaza wî hatiyê taloqkirin û li derve tedawî hatiye kirin. Lê tevî tedawiya kemoterapi berdewam dikir jî di 9ê Hazîranê 2026an de careke din hatiye girtin. Şert û mercên girtîgehê ji bo hijyena kemoterapiyê xetere ye. Divê înfaza Hamdullah Aydemîr demildest bê taloqkirin û bê berdan. Divê tedawiya wî li derve bi rêk û pêk bê kirin.”
