Li parêzgeha Silêmaniyê Tora Hevpeymaniya Rêxistinên Kurdistanî û gelek rêxistinên din, di salvegera sûcên Enfalê de daxuyaniyek çapemeniyê lidarxistin. Di daxuyaniyê de hate xwestin Iraq bibe endamê Dadgeha Ceza ya Navneteweyî (ICC) û lêborînê bixwaze.
Di daxuyaniya ku ji aliyê çalakvan Aras Xelîl ve hatî xwendin de, ev tişt hatin gotin; ‘‘Berî 38 salan, rejîma Baasê yek ji mezintirîn sucên dîrokî yên sedsala 20’an li dijî gelê Kurd pêk anî. Di nava heşt salan de, çar tawanên jenosîdê li ser gelê me meşandin, ew jî komkujiya Feylî, Barzanî, kîmyabarana Helebceyê û tawana Enfalê ne. Mixabin sal bi sal daxwazên me dubare dibin û sozên desthilatdaran bêencam mane.
Îsal em lîsteya daxwazên xwe bi van xalan pêşkêş dikin:
“Dadgehkirina tawanbarên Enfalê.
Lezkirin di anîna cenazeyên qurbaniyên Enfalê de.
Divê hikûmeta Iraqê lêborînê ji qurbaniyên jenosîdê bixwaze.
Paqijkirina lîsteya mûçeyên şehîdan ji gendelî û tawanbarên Enfalê.
Divê baregeha leşkerî ya Topzava bibe bîrdarî.
Divê serok çeteyên kevin tevlî siyasetê nebin.”
Di dawiya daxuyaniyê de hate gotin; “Ji bo ku tawana Enfalê dubare nebe, em daxwaz dikin ku Iraq bibe endama Dadgeha Ceza ya Navneteweyî. Berî 38 salan, rejîma Baasê tawana Enfalê di operasyoneke leşkerî ya 200 rojî de pêk anî, ku tê de zêdetirî 182 hezar welatiyên sivîl ên Kurdistanê bûn qurbanî, wê demê dadgeheke navneteweyî tune bû ku bibe asteng.
Em daxwaz dikin ku Iraq bibe endamê Dadgeha Tawanan a Navneteweyî ya ku wekî ICC (International Criminal Court-Dadgeha Ceza ya Navneteweyî) tê naskirin û niha 124 welat tê de endamin. Ger ev daxwaza me ya ku em 21 salin dikin bihata biciha anîn, tawanên Şengalê dubare nedibûn. Ji ber vê yekê em daxwaz dikin ku Iraq di zûtirîn dem de Peymannameya Romayê îmze bike.”
