Endama Akademiya Jineolojiyê ya Ewropayê Elîf Kaya encamên Konferansa Jineolojiyê ya Ewropayê, biryarên hatin wergirtin û armanca serdema nû ya kar nirxand.
Elîf Kaya diyar kir ku konferans piştî pêvajoya nîqaş û amadekariyê ya ji şeş mehan hate lidarxistin, jinên ji çand, civak û welatên cuda beşdar bûn û anî ziman ku nîqaş ne tenê di rojên konferansê de hatin kirin.
‘ME POTANSIYELA XWE DÎT, BIRYARÊN KU DIKARIN BI CIH BÎNIN WERGIRT’
Bi dewamî anî ziman ku di konferansê de wan hem potansiyela heyî hem jî karên ku heta niha nekarî bêne kirin nirxandin û destnîşan kir ku bi taybetî hate gotin, divê ew hîn bêhtir berê xwe bidin pirsgiriêkên jinan ên ku di nava jiyana rojane de li wan rast tên.
ElÎf Kaya diyar kir ku di mijara bidawîkirina astengiyên ji ber koç, temen û mercên jiyanê yên cuda yên jinan, her wiha di gihandina li ser zemîneke hevpar a jinan de divê hîn bêhtir hewl bidin û got, nîqaş jî li gel rêyên çareseriyê û pêşniyarên şênber hatin meşandin.
Elîf Kaya got, “Me hewl da biryarên ku karibin bi cih bînin werbigirin” û ragihand ku armanca bingehîn a konferansê naskirinan potansiyelê û wergirtina biryarên dikarin bi cih bêne anîn bû. Her wiha destnîşan kir ku ew bawer dike, wê biryarên hatine wergirtin bi cih bêne anîn.
‘AKADEMÎBÛYÎN YEK JI BIRYARÊN HERÎ GIRÎNG BÛ’
Endama Akademiya Jineolojiyê ya Ewropayê bi bîr xist ku Jineolojî zêdeyî deh sal in li Ewroparyê kar dike, destpêkê kar li ser qadên destpêkê û têkilîdanînê hate meşandin û bi demê re danheviyeke girîng hate afirandin.
Elîf Kaya ragihand ku yek ji biryarên herî girîng ên konferansê akademîbûn bû, biryar hate dayin ku karên Jineolojiyê bi perspektîfa akademiyê bê meşandin û got, karê bi rengê komîteyê ji aliyê belavbûn û hilgirtina berpirsyariyê ji aliyê gelek kesan ve teng ma.
Kaya diyar kir ku civaka Kurd a li dîasporayê xwedî tecrûbeyeke girîng a têkoşînê û rêxistinbûnê ye û destnîşan kir ku karên ji bo afirandina zanistî û zanîna vê danheviyê divê bêne zêdekirin.
Di vê çarçoveyê de ragihand ku hevpariya li qadên weke koç, têkoşîna li dijî tundiya li hemberî jinê, lêkolîn û pedagojiyê hate nîqaşkirin û got, weke armancekê hate destnîşankirin ku li qadên jin, zarok, extiyar û koçê de komxebat û perwerdeyên hevpar bêne ldiarxistin, bi rêya vî karî tecrûbe werin parvekirin û perspektîfeke hevpar bê afirandin.
TUNDIYA LI DIJÎ JINÊ, KOÇ Û KARÊN MALBATA DEMOKRATÎK
Li gorî Elîf Kaya tundî û newekheviya li hemberî jinê ya di jiyana rojane de yek ji qadên kar ên bingehîn ên Jineolojiyê ye. Kaya bi bîr xist ku li Elmanyayê di nava sala dawî de 103 jin hatin kuştin. Elîf Kaya işaret bi girîngiya zêdekirina derfetên parastina hebûna jinê kir û anî ziman ku ev mijar di peyama Rêber Apo ya ji bo konferansê de jî hate nirxandin.
Elîf Kaya ragihand ku yek ji sernavên sereke yên konferansê zêdekirina karên ji bo çareserkirina prisgirêkên jinan ên li koçberiyê û dîasporayê bû û destnîşan kir ku karên ji bo pêşîgirtina li tundiya li nava malbatê û mêtingeriyê wê ji karên sereke be.
Di vê çarçoveyê de anî ziman ku karên malbata demokratîk, bernameyên li ser guherîn û veguherîna mêr û projeyên hevpar divê bêne afiandin.
Elîf Kaya xurtkirina karê hevpar li gel meclîsên jinan weke yek ji armancên bingehîn pênase kir û di vê çarçoveyê de bal kişand ser destpêkirina karên Jineolojiyê li Elmanya, Fransa, Skandînavyayê li gel meclîsên jinan.
GIRÎNGIYA KARÊ ARŞÎVÊ
Elîf Kaya destnîşan kir ku karên di dema nû de bêne kirin divê daneheviya rabirdûyê jinedîtî ve neyê û bi bîr xist ku karên niha tê kirin xwe dispêre tecrûbeya 12 salan.
Ji bo ev tecrûbe hîn bi rêk û pêk bibe Elîf Kaya bal kişand ser girîngiya karên weşangerî û arşîvê.
Elîf Kaya diyar kir ku ew dixwazin karên arşîvê di bin sîwana akademiyê de bi pêş ve bibin û ji bo mayindekirina zanîna têkiliyên bi civakê û lêkolînan pêwîstî bi weşangeriyekê heye.
‘GIRÎNG E KU JIN BIBÎNE KU BI TENÊ NÎNE’
Endama Akademiya Jineolojiyê anî ziman ku ji Îrlanda, Katalonya, Brezîlya û Fîlîstînê jin tevlî konferansê bûn û diyar kir ku Jineolojiyê lêpirsîn û lêgerîna têkildarî xwebûnê pêşkêşî jinan kir.
Elîf Kaya got, “Dema ku jin zanibe ku li cihê lê dimîne bi tenê nîne, tecrûbeyên wê dikare îlhamê bide hinekî din an jî ji hinekî din îlhamê werbigire, ev yek wê tevkariyê li kûrkirina vî karî bike.”
‘ARMANCA ME EW E KU JINEOLOJÎ XWE BIGIHÎNE JIYANA HER KESÎ’
Elîf Kaya ragihand ku yek ji armancên bingehîn ên konferansê ew e ku zemîna rêxistinbûnê li gorî potansiyela heyî bê amadekirin û got, di konferansa pêş de ew dixwazin encamên biryarên hatin wergirtin binirxînin.
Elîf Kaya diyar kir ku ew dixwazin bala xwe bidin ser pirsgirêkên rojane yên jinan, karên plankirî biqedînin, li ser van tecrûbeyan paşerojê plan bikin û li ser armanca xwe ya bingehîn got, “Em dixwazin Jineolojiyê bikin rêxistiniyeke zanînê ku di nava jiyana me ya rojane de hebe û xwe bigihîne jiyana her kesî. Armanca me ya bingehîn pêkanîna vî karî ye.”
