Li Mêrsînê tevî barana zêde jî, Newroz hat pîrozkirin. Welatî ji serê sibê ve gihîştin Qada Tirmil a navçeya Akdenizê. Welatiyên ji her temenî, bi cilên gelêrî yên bi rengên kesk, sor û zer qad xemilandin, li ber dirûşmeya “Bijî Serok Apo” govend gerandin. Bernameya pîrozbahiyê bi deqeyek rêzgirtin û axaftinan dest pê kir.
Hevberdevkên Komîteya Amadekar a Newrozê, gel silav kirin û peyamên ji bo pîrozbahiyê hatin xwendin. Piştî peyamên girtiyên siyasî, peyama Newrozê ya Rêber Apo hate parvekirin. Posterên Rêber Apo û wêneyên pêşengên Kurdan Mazlûm Dogan, Sema Yuce û Zekiye Alkan li qadê hatin hilgirtin.
Agirê Newrozê bi dirûşmeyên “Jin, jiyan, azadî” û “Bê Serok jiyan nabe”hate vêxistin. Piştre aktîvîsta Tevgera Jinên Azad (TJA) Sara Kaya, axivî û hevrêyên jin ên di girtîgehê de silav kir û got, “Em silavên xwe ji Îmraliyê re dişînin. Em dixwazin salek şûnda Rêbertî nava xwe de bibînin.”
Piştre hunermendên herêmî derketin ser dikê.
Serokwekîla Koma DEM Partiyê Gulistan Kiliç Koçyîgît jî ev tişt gotin, “Em silavên xwe ji Îmraliyê re dişînin û Newroza Birêz Ocalan pîroz dikin. Kurd jiyaneke azad, demokratîk û aştiyane dixwazin. Têkoşîna li girtîgehan me anî vê rojê. Dem dema xurtkirina ruhê neteweyî yê ku di pêvajoya Rojava de derket holê ye. Divê Meclîs demildest gavên pêwîst bavêje; deriyên girtîgehan werin vekirin, dawî li pêkanîna qeyûman bînin û hevşaredar vegerin ser wezîfeyên xwe. Salek şûnda, em naxwazin hîn jî peyaman bixwînin; em dixwazin Birêz Ocalan di pîrozbahiyên Newrozê de bibînin. Divê deriyên Îmraliyê werin vekirin.”
Piştî axaftinan hunermend Rûken Yilmaz derket ser dikê û pîrozbahî bi stran û gerandina govendan bi dawî bû.
