Meral Daniş Beştaş diyar kir ku li herêmê dîrokeke nû tê nivîsandin û ev pêvajo jî bi têkoşîna gelan diyar dibe.
Meral Daniş Beştaş işaret bi têkoşîna salan a gelê Kurd kir û anî ziman ku li gel zextê jî bi milyonan mirov daketin qadan. Beştaş destnîşan kir ku Newroz sembola lêgerîna li azadiyê û berxwedanê ye.
Meral Daniş Beştaş peyama wekhevî û jiyana bi hev re da û got, “Kurd dibe, Tirk dibe, bila wekhev be. Bila pêşketin hebe. Êdî Stenbol Amed e, Amed Stenbol e.”
Di dewama axaftina xwe de Meral Daniş Beştaş daxwaza azadiya Rêber Apo kir û got, “Me ti carî dest ji evîna xwe ya azadiyê berneda, em ê dest jê bernedin. Di vê rêyê de ku ber bi azadiyê ve diçe 27’ê Sibatê werçerxek e. Cihê bextewariyê ye ku Rêberekî me heye. Em silavan ji Birêz Ocalan re dişînin. Rêbertî ku gelê xwe diparêze, ji bo azadiyê têdikoşe, xwedî cihekî mezin e. Cihê wî nava gel e, ne girtîgeh e. Em dibêjin, bila deriyên Îmraliyê bên vekirin. Em gelekî nêzî vê derê ne. Daxwaza bi milyonan mirovî azadî ye.”
Meral Daniş Beştaş ji bo berdana siyasetmedarên girtî bang kir û diyar kir ku di rêveberiyên xwecihî de divê îradeya gel esas be û gel karibe bajarê xwe bi xwe bi rê ve bibe.
