Platforma Saziyên Demokratîk, Înîsiyatîfa Yekîtiya Demokratîk û partiyên Kurdî têkildarî êrişên li ser Bakur û Rojhilatê Sûriyeyê li Baroya Amedê daxuyaniyek dan. Li gel Hevserokên Giştî yên Partiya Herêman a Demokratîk (DBP) Çîgdem Kiliçgun Ûçar, Keskîn Bayindir, nûnerên gelek partiyên siyasî û rêxistinên civakî yên sivîl beşdarî daxuyaniyê bûn. Li salona daxuyaniyê pankarta bi nivîsa “Êrişan bisekinînin. Rojava wijdan e, berxwedan e, azadî ye” hate daliqandin.
Hevserokê Giştî yê DBP’ê Keskîn Bayindir anî ziman ku ji 6’ê Çileyê û vir ve li Sûriyeyê li ser Kurdan êrişeke hovane tê kirin û gelê Kurdistanê û aştîxwazên li Rojhilata Navîn li hemberî van êrişan li ber xwe didin.
Keskîn Bayindir got, “Tirkiye jî piştgiriyê dide van êrişan. Dijminatiya li Kurdan ti carî encameke baş ji bo Tirkiyeyê bi xwe re neanî. Wê ji niha û pê ve jî nîne. HTŞ ku bi hemû hêza xwe ji 6’ê Çileyê û vir ve êriş dike, ji Tirkiyeyê piştgiriyê werdigire. Ev yek jî gelê Kurd dişikîne. Têkildarî pêvajoya li Tirkiyeyê jî baweriyê dişikîne. Banga me ew e ku Tirkiye dawî li piştgiriya bi HTŞ’ê bîne ku xwedî mejiyê DAÎŞ’ê ye.”
Keskîn Bayindir anî ziman ku ev yek wê encameke neyînî ji bo paşeroja Tirkiyeyê bi xwe re bîne û got, “Em careke din hişyar dikin: Bila hikumet û dewleta Tirk polîtîkayeke rast bimeşîne. Ji bo aştî û azadiya gelê Kurd û Rojhilata Navîn bila di nava hewldanan de be û bi roleke bi vî rengî rabe. Bila roleke welê nelîze ku agirê li Rojhilata Navîn gur bike. Heta niha roleke nebaş lîst.
Tirkiye bi her awayî piştgirî da HTŞ’ê ku dixwaze ev pêvajo biqede û xwedî mejiyê DAÎŞ’ê ye. Lê belê em ji feraseta gelê xwe her tim bawer dike ku aştî, azadî û wekheviyê dixwaze. Eger em dest bidin hev em ê bi ser bikevin. Êrişên li ser gelê Kurd, êrişên li ser Rojava Kurdên li çar parçeyên Kurdistanê û cîhanê kir yek dil. Ji bo gelê Kurd, ji bo me ev yek hêviyeke mezin e. Em di wê baweriyê de ne ku bi vê hêviyê gelê me wê xwedî li statu, rûmet û destketiyên xwe derkeve. Bi derfetên xwe em ê xwedî li destketiyên gelê xwe derkevin. Em ê biparêzin. Êriş bi rengekî hovane jî be, em ê bi ruhê yekîtiyê, bi ruhê aştî û azadiyê li her derê li ber xwe bidin. Em ê li qadan bin, em ê çalakiyên demokratîk li her derê lidar bixin. Israra li ser dijminatiyê heta niha bi kêrî kesî nehat. Banga me ya herî girîng jî ew e ku dawî li polîtîkayên qirêj bê anîn ku şer sor dike, koçberiyê ferz dike. Em vê xakê bikin cihê azadî û aştiyê.”
Dayika Aştiyê Delal Aktaş jî bang kir ku bi ruhê Kobanê rabin ser piyan û got, “Dixwazin ku em pêvajoyê xera bikin. Lê belê em ê pêvajoyê xera nekin, lê em ê li ber xwe bidin. Em ê têkoşîna xwe bimeşînin. Bila her kes bi berpirsyariya xwe rabe. Bila kes li malê rûnenê. Em hemû xwedî ruhê Kobanê ne. Em hemû bi Rojava re ne.”
Hevberdevkê Înîsiyatîfa Yekîtiya Demokratîk Mehmet Kamaç jî diyar kir ku Rojava nîşaneya Kurdên li çar parçeyên Kurdistanê ye û got, “Destketî di rojekê de bi dest neketin, bi berdêlên giran bi dest ketin. Berxwedana Rojava ne tenê berxwedana gelekî ye, berxwedana rûmeta mirovahiyê ye. Ev êriş li hemberî Kurdan hemûyan, li hemberî parêzvanên mafên mirovan têne kirin. Bi êrişên hovane yên li ser gelê Kurd xwestin Kurdan tine bikin. Lê belê Rojava bi berdêlên giran bi ser ket. Divê yekîtiya Kurdan destpêkê pêk were. Yekîtî ji bo Kurdan ji nan, av û hewayê bêhtir pêwîst e. Li çar parçeyên Kurdistanê baweriya me, saziyên me çi dibin bila bibin, divê li ser rûmeta neteweyî ya gelê Kurd yekîtî bê afirandin. Li dijî van êrişan dilê 60 milyon Kurdî li Rojava lê dide. Em zanin ku ji bo gelê Kurd Rojava xeta sor e. Bersiva herî mezin a gelê Kurd a li hemberî êrişan wê yekîtiya Kurdan be.”
Ji Platforma Yekîtiya Jinên Kurd Fatoş Stêrk jî anî ziman ku bi rêya êrişan tê xwestin ku şoreşa jinê bê fetisandin ku ji cîhanê re bûye hêvî û got, “Hewl didin destketiyên me ji me bistînin. Di pêvajoyên krîtîk de bêdengî xizmetê ji dagirkeran re dike. Ji bo paşeroja Kurdan beriya her tiştî bi pêşengiya jinan pêwîstî bi yekîtiyê heye. Ji bo Rojhilata Navîn ji bo Kurdistanê çareya herî mezin yekîtiya Kurdan e. Ev nebe em ê li hemberî êrişan bêparastin bimînin. Lê belê eger em bibin yek, wê ti hêz nikaribe li hemberî azadiya me bisekine. Werin em daxwaza yekîtiyê mezin bikin, xwedî li destketiyên xwe derkevin. Îro roja xwedîderketina li rûmeta gelê me ye.”
Serokê Partiya Demokrat a Kurdistanê li Tirkiyeyê (PDK-T) Mehmet Emîn Kardaş li hemberî êrişan bal kişand ser girîngiya yekîtiyê û destnîşan kir ku partiyên Kurd ên li Tirkiyeyê divê bibin yek.
Berdevkê Bajarê Amedê yê Partiya Komunist a Kurdistanê (KKP) Mûrat Daniş êrişên li ser gelê Kurd ên lit axên Helebê şermezar kir û got, “Em bang li gelê xwe ye li tevahiya Kurdistanê, raya giştî ya herêmê û cîhanê dikin ku piştgiriyê bide gelê me yê li Rojava. Banga me li gelê me yê li çar parçeyan û dîasporayê ev e: Bi ruhê yekîtiya neteeyî piştgiriyê bi gelê me yê li Rojava re bikin.”
Ji Partiya Azadî Cemal Sati jî diyar kir ku rizgariya Kurdan bi yekîtiyê dibe û berxwedana Rojava silav kir.
