Meclîsa Ciwanan a Partiya Demokrasî û Wekheviyê ya Gelan (DEM Partî) bi wesîleya rojbûna 76’an a Rêber Apo ji Amedê ber bi gundê Amara yê navçeya Xelfetî ya Rihayê meşê lidar dixe. Meşa ku bi dirûşma ‘Em bi civaka demokratîk ber bi azadiyê ve dimeşin’ destpê kir, wê 4’ê Nîsanê li Amarayê bi dawî bibe.
Endamê Meclîsa Ciwanan a DEM Partiyê Alîhan Şîmşek li ser meşê ji ANF’ê re axivî û got, “Sedema coş û heybeta vê meşê û ya gel, banga ‘Aştî û Civaka Demokratîk’ e ku Rêberê Gelê Kurd Birêz Abdullah Ocalan di 27’ê Sibatê de kir. Ev banga Birêz Ocalan li Rojhilata Navîn bi taybetî jî li nava gelê Kurd bersiva xwe bi xurtî dît. Bi vê bangê re me dît ku dengê ku demeke dirêj e tê birîn, ji nû ve geş bûye. Yekane sîstema ku dikare alternatîfê ji modernîteya kapîtalîst re biafirîne, paradîgmaya Modernîteya Demokratîk û manîfestoya jiyana azad a Rêberê Gelan Abdullah Ocalan e. Ev bang jî gaveke civakîbûna wê ye. Armanca bingehîn a meşa me jî ev e: Belavkirina paradîgmaya Modernîteya Demokratîk û pêkanîna azadiya fîzîkî ya Birêz Abdullah Ocalan.”
Şîmşek anî ziman ku meş li her rawestgehê bi coşeke mezin ji aliyê gel ve tê pêşwazîkirin û got, “Me ji warê berxwedanê ji Amedê destpê kir. Gelê me bi coş û moreleke mezin em bi rê kir. Li her devera ku em jê derbas bûn bi hezaran kesî em pêşwazî kir. Em bi dahol, zirne û govendê têne pêşwazîkirin, ev yek hêzê dide me. Kelecana me gelekî bilind e, gel daxwaza aştiyê dike. Em di demeke welê de ne ku wê rengê xwe bide dîrokê.”
Şîmşek bang li gelên Kurdistanê û Tirkiyeyê kir ku 4’ê Nîsanê li Amarayê bin û got, “Em diçin Amarayê ku vejîna rêbertî ya paradîgmayê ya ji bo jiyana bi rûmet a gelan lê afirî. Me ji warê berxwedanê destpê kir û em ber bi warê vejînê ve diçin.”
Şîmşek herî dawî bang li cwanên Kurd, jin ên ciwan ên Kurd, tevgerên şoreşger ên Tirkiyeyî û enternasyonalîstan kir ku li Amarayê bin û got, “Ji bo azadiya fîzîkî ya Rêberê Gelê Kurd Abdullah Ocalan pêk bînin û xwedî li paradîgmaya wî û rêxistiniya civakî ya bi îradeya wî derkevin, ji bo pêkanîna wê em diçin Amarayê. Werin em bi hev re agirê ku me di Newrozê de dadan, li Amarayê ji nû ve gş bikin. Bi vê coşê em bi hev re daxwaza azadiya fîzîkî ya Rêberê Gelê Kurd Abdullah Ocalan bînin ziman.”
