FEDA û DAKB’ê êrîşên hêzên hikûmeta Şamê yên li ser Suweydayê weke ‘’komkujiyê’’ pênase kirin û gotin: ‘’Li Sûriyeyê li hemberî komkujiya li ser Elewiyan nerazîbûneke bihêz û bergir nehatin nîşandan û pêşxistin. Kujerên HTŞ’yî yên ji vê yekê hêz girtin, a ni ha jî li hemberî Durziyan komkujiyan pêk tînin.’’
Di daxuyaniyê de ev yek hatin gotin: ‘’ HTŞ’ya (Heyet Tahrir el-Şam) ku bermahiya EL-Nusra û DAÎŞ’ê ye û nûnertiya îdeolojiyeke tarî dike, Kurd, Durzî û Elewî weke dijmin îlan kirine û qetilkirina wan qaşo weke erk û îbadetekê dibîne.’’
FEDA û DAKB’ê diyar kirin ku divê destûr neyê dayîn ku ev sûcê li dijî mirovahiyê were kirin û gotin: ‘’Çawa ku me li dijî komkujiyên li ser Elewiyan li ber xwe da em neçar in ku li dijî komkujiya li ser Durziyan jî li ber xwe bidin.’’
Di daxuyaniyê de peyama; ‘’Ger îro ev êrîşên komkujiyê neyên têkbirin wê aşitî û aramî neyên herêmê’’ hate dayîn.
FEDA û DAKB’ê piştre ev yek anîn ziman: ‘’Ji ber ku bi vî rengî ye kujerên HTŞ’yî, li hemberî rêveberiya Bakur û Rojhilatê Sûriyeyê jî helwestê digirin. Lihevkirina ku di 10’ê Adara 2025’an de hatî îmzekirin, bi cih naînin. Ji ber vê yekê divê em hemû gelên bindest û baweriyên cuda li gel rêveberiya Bakur û Rojhilatê Sûriyeyê yekbûna xwe pêk bînin û van êrîşan têk bibin.’’
Bi dewama daxuyaniyê de ev yek jî hatin gotin: ‘’Dibe ku îro Durzî û Elewî di hedefê de bin. Lê belê ger bêdengî berdewam bike û pêşerojê dor were kê? Di hedefa van hovan de bes mezheb û etnîkeke diyar tune ne. Hemû cudahî di hedefa wan de ye. Hemû azadî di hedefa wan de ye. Hemû mirovahî di hedefa wan de ye.’’
Daxuyanî bi van gotinan bi dawî bû: ‘’Em bang li hemû gelên bindest, bawerî û kesên xwedan wijdan dikin: Werin em li dijî êrîşên komkujiyê yên li Sûriyeyê û zextên li ser Rojava bi îradeya demokratîk piştevaniya hevûdu bikin û li hemberî vê tarîtiyêli ber xwe bidin.
Ji ber ku ev bes ne qîrîna Durziyan e. Ev hawara hemû gelên li Rojhilata Navîn e. Û êdî divê cîhan li hemberî vê qîrînê bê deng nemîne. Bêdengî hevkariya zulmê ye.’’
