Federasyona Demokratîk a Elewî (FEDA) û Yekîtiya Jinên Elewî yên Demokratîk (DAKB), bi daxuyaniyeke hevpar diyar kirin ku tundiya li dijî jinan û windakirina wan ne bûyerên takekesîne û gotin, “Berhema sîstemeke plankirî û domdar e.”
Di daxuyaniyê de hat diyarkirin ku di nav saziyên dewletê de “sîstemeke bêdengiyê” heye û hat gotin ku tunekirina delîlan, veşartina rastiyê û dereng mayîna edaletê weke pergalek rûniştiye.
Ji ber vê jî mînaka herî berbiçav ên vê rewşê Gulîstan Doku ku şeş sal in nehatiye dîtin, hat nîşandan. Hate diyarkirin ku ev bûyer gumanê xurt dike ku rastî bi zanebûn tê veşartin.
FEDA û DAKB’ê destnîşan kirin ku gelek dozên bi vî rengî yên mîna Rojîn Kabaîş, Îpek Er, Rabîa Naz Vatan, Nadîra Kadîrova û Yeldana Karaman hîn jî nehatine ronîkirin ku ev yek nîşan dide ku pirsgirêkek hevpar heye.
Di daxuyaniyê de bang li rayedaran hat kirin ku lêpirsînek bi bandor û cidî bimeşînin. Her wiha hate diyarkirin ku mafê jiyanê yê jinan hatiye binpêkirin û malbat bi salan di rewşek nezelaliyê de hatine hiştin.
FEDA û DAKB’ê destnîşan kirin ku ew ê dev ji têkoşîna ji bo heqîqet û edaletê bernedin û ev tişt gotin, “Li dijî vê tarîtiyê em ê bêdeng nemînin. Ji ber ku di têkoşîna me de bêdengî nîne. Baweriya Elewiyan vê rastiyê hînê me kir: her giyan wekhev e, her giyan pîroz e û her heqîqet dereng be jî wê ronî bibe.”
