Serokkomarê Fransayê Emmanuel Macron, beriya konferansa ku wê li New Yorkê bi Erebîstana Siûdî re bê lidarxistin got ku Fransa wê di meha Hezîranê de dewleta Filîstînê nas bike. Macron, destnîşan kir ku ev gav wê di heman demê de bibe wesîle ku Îsraîl jî ji aliyê hin dewletan ve bê naskirin
Serokkomarê Fransayê Emmanuel Macron, roja Sêşemê dema ji Misrê vegeriya, di hevpeyvînekê de li ser kanala France 5 got ku ew ê ji bo naskirina dewleta Filîstînê “di mehên pêş de gavan bavêjin.” Macron, got ku ew dixwazin di konferansa ku wê di meha Hezîranê de bi Erebistana Siûdî re bê pêkanîn, pêvajoyeke ku tê de hevdu naskirin hebe bidin destpêkirin. Di konferansê de wê li ser çareseriya du dewletan bê seknandin.
Macron, her wiha destnîşan kir ku ev naskirin wê bibe beşek ji “dînamîka kolektîf û adil” ku ne tenê piştgirî dide Filistînê, di heman demê de wê rê li ber naskirina Îsraîlê jî veke.
Macron, diyar kir ku ev gav wê bibe alîkar ku helwestek zelal li hember wan kesên ku hebûna Îsraîlê înkar dikin, weke Îranê, nîşan bide.
Lê Îsraîl nerazîbûn nîşanî vê îhtîmalê da. Wezîrê Karên Derve yê Îsraîlê Gideon Saar jî ragihand ku qebûlkirina Filîstînê ji aliyê Fransayê ve wê “ji bo terorê bibe xelat” û “piştgiriya ji bo Hamasê”.
Saar destnîşan kir ku pêngavek wiha dê aştî, ewlehî û aramî neyîne.
