Piştî banga Rêber Apo ya dîrokî û agirbesta ku PKK’ê îlan kir, li Tirkiye û Bakurê Kurdistanê nîqaşên têkildarî pêvajo û diyalogê berdewam dikin. Rêber Apo di hevdîtina li gel malbatê ya dawîn de xwedîderketina bangê ya li qadên Newrozan silav kir û Cejna Newroz û Cejna Remezanê li her kesî pîroz kir.
Dewlet di nîqaşên pêvajo û diyalogê de dixwaze mijarê bi çekberdan û lidarxistina kongreya PKK’ê sînordar bike. Lê belê tevî banga Rêber Apo jî pêngavên ku divê dewlet biavêje, nayên avêtin. Weke ku mafê Rêber Apo yê hêviyê nehatiye dabînkirin, şert û mercên tecrîdê jî berdewam dikin.
Nivîskar Fûat Kav têkildarî vêmijarê pirsên ANF’ê bersivandin.
Fûat Kav banga Rêber Apo weke deklarasyonekê pênase kir û diyar kir ku ev bang dikare pirsgirêka Kurd çareser bike û di heman demê de projeyek e. Kav destnîşan kir ku bang zelal e got: ‘’Rêber Apo dibêje ku ew dikare pirsgirêkan li ser zemîna siyaseta demokratîk çareser bike. Diyar dike ku têkoşîna çekdarî kevn bûye û ew dikare pirsgirêkan bi rêya diyalogê çareser bike. Ji ber wê îfade dike dku hewceyî bi amûrên nû heye.’’
‘BEŞEKE DI NAVA DEWLETÊ DE QANIH NEBÛYE’
Fûat Kav di dewama axaftina xwe de diyar kir ku PKK guherîn û veguherîna xwe digire dest û bi bîr xist ku dewletê heya niha tu pêngav neavêtine. Kav piştre helwesta dewletê weke helwesta ‘’gîrokirin, taloqkirin û helwesteke jirêzê’’ pênase kir û anî ziman ku divê dewlet pêngavên hewce biavêje.
Kav piştre diyar kir ku hin beşên di nava dewletê pirsgirêkê bes di çarçoveya ‘’terorê’’ de digirin dest û got ku pirsgirêk bi bi dawîbûna têkoşîna çekdarî yan jî bi xwefesixkirina PKK’ê çareser nabe. Fûat Kav destnîşan kir ku beşeke di nava dewlet û AKP’ê de qanih nebûye û beşa berbehs bi mantiqa klasîk a dewletê li nêzî pirsgirêka Kurd dibin û got: ‘’Ji aliyê Serok Apo ve pêvajoyek hatiye destpêkirin. Ne zelal e ku wê dewlet bersiveke çawa bide vê pêvajoyê. Yanî AKP wisa ye. Tayyîp Erdogan jî wisa ye. Ger pêvajo bi awayekî erênî derbas bibe dê xwedî lê derkeve lê belê ger pêvajo baş derbas nebe wê bibêje ku ‘haya min jê tune bû.’ Wê bibêje ku ‘dewletê ev yek kir.’
‘GIRTINA ÎMAMOGLÛ TÊKILDARÎ PÊVAJOYÊ YE’
Fûat kav anî ziman ku girtina Serokê ÎBB’ê Ekrem Îmamoglû jî têkildarî pêvajoyê ye û ev yek anîn ziman: ‘’Du aliyên vê mijarê hene; ya yekem ew e ku Îmamoglû ji bo serokkomariyê namzedekî bi hêz e û ihtimala serkeftina wî bilind bû. Aliyê duyem jî têkildarî pêvajoyê ye. Aliyên ku naxwazin pirsgirêka Kurd çareser bibe, dibin sedema rageşiyê. Yanî bûyerên têkildarî Îmamoglû têkildarîpêvajoyê ne. Kesên ku vê yekê dikin jî ew kes in ku naxwazin pirsgirêka Kurd çareser bibe.’’
‘NE DIYAR E KU PÊVAJO WÊ BER BI KU VE BIÇE’
Fûat Kav di dewama axaftina xwe de destnîşan kir ku ne diyar e ku wê pêvajo ber bi ku ve biçe û got ku rewş ji aliyê PKK, gelê Kurd û Rêber Apo ve diyar e lê belê zelalî li gel dewletê tune ye û got: ‘’Piştî bangê di şert û mercên Serok Apo de tu guhertin pêk nehatine. Hevdîtin bi destûrê pêk tên û wextê wan kêm e. Serok Apo nikare bi kesên ku dixwaze re hevdîtinê pêk bîne.Yanî têkildarî şert û mercên Îmraliyê guhertinek tune ye.’’
‘DIVÊ ŞERT Û MERCÊN RÊBER APO WERIN SERERASTKIRIN’
Kav piştre anî ziman ku girêdayî van şert û mercan ne pêkan e ku Rêber Apo guherîn û veguherîna ji nû ve pêk bîne, divê dewlet rêya vê yekê veke û ev berpirsiyarî ya dewletê ye.
Kav îfade kir ku divê teqez şert û mercên Rêber Apo werin sererastkirin û got: ‘’Lidarxistina kongreyeke ku dewlet tim tîne ziman, ne pêkan e. Bi zextê tu partî kongreyê li dar naxe û xwe fesix nake. Mînaka vê yekêli seranserê cîhanê tune ye. Pirsgirêkeke 200 salî û têkoşîneke 40 salî heye. Ev pirsgirêk bi kongreyê çareser nabe. Ji ber vê yekê jî hewceyî bi helwesteke diyar ya dewlet, AKP û Devlet Bahçelî heye. Beriya her tiştî divê şert û mercên Rêber Apo werin sererastkirin.’’
‘ÇALAKÎ DESTÊ RÊBER APO XURT DIKIN’
Fûat Kav di dawiya axaftina xwe de bal kişand ser 4’ê Nîsanê rojbûna Rêber Apo û ev yek anîn ziman: ‘’4’ê Nîsanê rojbûna Rêbertî ye. Ne tenê rojbûna kesekî ye di heman demê de rojbûna neteweyekê ye. Tê wateya rojbûna îdeolojîû tevgerekê jî. Ji ber vê yekê jî çalakî û şahiyn ku wê werin lidarxistin divê layiqî Serok Apo bin. Bi hemû çalakiyan wê destê Rêber Apo xurttir bibe. Em dikarin 4’ê Nîsanê weke vejîn û rêya azadbûna gelekî jî pênase bikin. Bi vê wesîlyê ez rojbû»na Serok Apo pîroz dikim.’’
