Fermandariya Yekîneyên Berxwedana Şengalê (YBŞ), li ser hinek bûyerên bi gûman ên van demên dawiyê li navenda bajarê Şengalê rû didin û tometên hêzên Iraqê daxuyaniyeke nivîskî da.
Di daxuyaniyê de hate diyarkirin ku hinek alî li Şengalê li pey fitne û têkdana aramiya Şengalê ne.
Têkildarê bûyer û hinek teqînên bi gûman ên li navenda bajêr çêbûne di daxuyaniya fermandariya YBŞ’ê de wiha tê gotin: “Di van demên dawiyê de hinek hewldan hene dixwazin rastiyan berovajî bikin û fitneyê derbixin. Em bi awayeke tund van tomet û senaryoyên hinek alî dixwazin ji bo me çêbikin, red dikin.”
Fermandariya YBŞ’ê Li ser agahiyên derbarê YBŞ’ê de di hinek ragihandinên Iraq û herêmê de belav bûne jî wiha got: “Di derbarê me de li ser ragihandinê hinek îdîa belav bûn û xwestin hinek bûyeran bi me ve girê bidin. Em dibêjin, ev îdîayên di ragihandinê de belav bûne dûrî rastiyê ne.
Ev îdîayên dûrî rastiyê, tenê xizmetê ji ajandayên bi gûman ên dixwazin ewlehî û aramiya Şengalê têk bidin re dike.”
YBŞ’ê da zanîn ku bi van tomet û agahiyên dûrî rastiyê dixwazin têkoşîna wan nerewa nîşan bidin û ev peyam da: “Hewl didin têkoşîna me ya rewa û mafdar reş bikin û guman bixin li ser prensîb û pîvanên me.”
Fermandariya YBŞ’ê ragihand ku ew weke mertalên zindî yên hemû gelên Şengalê ne û dê wisa jî bimînin. Di beşa dawî ya daxuyaniyê de wiha hate gotin: “Em careke din dubare dikin, em mertalên zindî yên ji bo parastina gelê xwe yê Şengalê ne. Em bang li her kesê dikin ku hişyar bin û nekevin bin bandora agahiyên şaş û tometên bê bingeh ku dixwazin fitneyê çêbikin.”
Hêjayî bi bîr xistinê ye ku şeva borî di saetên dereng de li sûka kevin a Şengalê teqînek ku sedema wê ne hate zanîn, çêbû. Artêşa Iraqê jî vê yekê ji xwe re kir hêcet û careke din Şengal milîtarîze kir. Hinek ragihandinên Iraqê jî xwestin vê yekê bi YBŞ’ê ve girê bidin.
