Parêzera girtiyê nexweş Mehmet Emîn Çam Nezahat Celen got, “Dema dawî nikare bimeşe, çavê wî nabîne. Gardiyanan gotin, ‘Hûn hevdîtinê nekin gelo wê ne baştir be, ji ber ku muwekîlê we gelekî diêşe, nikare bimeşe’. Nikare derkeve hevdîtinan.”
Li gorî Rapora Mehkûmên Nexweş a Komeleya Mafên Mirovan (ÎHD) hezar û 412 girtiyên nexweş hene ku herî kêm 335 ji wan rewşa wan giran e. Li gel serlêdanan jî nayên berdan. Yek ji girtiyên ku êdî bi tena serê xwe nikare jiyana xwe dewam bike Mehmet Emîn Çam ê 73 salî ye ku li gel du caran krîza dil derbas kir û gelek caran rakirin nexweşxaneyê nayê berdan. Serlêdana herî dawî ya ji bo Mehmet Emîn Çam hate kirin, bi rengekî neyînî bi encam bû.
Parêzer Nezahat Celen anî ziman ku pêvajo bi rengekî wijdanî û hiqûqî nayê meşandin û ji bo “Ji bo mafê jiyanê divê bi lez biryar bê wergirtin” bang kir. Celen got, “Ew nema dikare li girtîgehê bimîne. Muwekîlê min doh rakirin nexweşxaneyê. Me di daxwaznameya xwe ya beriya niha de gotibû, rîsk heye ku careke din krîza dil derbas bike.”
DI NAVA DU HEFTEYAN DE DU CARAN RAKIRIN NEXWEŞXANEYÊ
Celen ragihand ku Çam dikare careke din bypass yan jî emeliyata dil derbas bike û got, “Mixabin niha li Girtîgha Beşîrî pirsgirêkeke giştî ya avê heye. Ji ber vê yekê li gel hevalên wî yên li koxûşê muwekîlê min jî rakirin nexweşxaneyê. Du caran birin nexweşxaneyê. Muwekîlekî min ê din ê li heman koxûşê emeliyat bûbû. Girtiyekî din jî ji ber nexweşiya gurçikê li nexweşxaneyekê ye.”
‘NIKARE BIMEŞE, ÇAVÊN WÎ NABÎNE’
Celek diyar kir ku muwekîlê wî zehmetiyê dikişîne ku li girtîgehê jiyana xwe dewam bike û got, “Dema dawî nikare bimeşe, bi nexweşiya dil e, çavên wî nabîne. Nikare derkeve hevdîtinan. Herî dawî dema ku hempîşeyekî me çû hevdîtinê, nikarîbû tevlî hevdîtinê bibe. Ji ber ku nikare bimeşe, li gel hevalekî ku ketibû bin çengê wî, tevlî hevdîtinê bûbû.”
‘MUWEKÎLÊ WE GELEKÎ DIÊŞE’
Parêzer Celen ragihand ku Çam ê ku bêhna wî diçike, bi zehmetî dimeşe, rêyeke ji 5 deqeyan bi 20 deqeyan bi zorê dimeşe û got, “Gardiyanan ji me re gotin, ‘Gelo hûn neyên hevdîtinê wê nebe, ji ber ku muwekîlê we gelekî diêşe, nikare bimeşe’. Milê xwe yê çepê qeti nikare bilivîne. Li xwe kêm kiriye. Ji ber ku bi zehmetî dimeşe, hevdîtinê qebûl nake. Du rehên wî girtî ne, dibe ku careke din bypass bibe.”
‘JI BO MAFÊ JIYANÊ DIVÊ ZÛ BIRYAR BÊ DAYIN’
Celen destnîşan kir ku ji aliyê hiqûqî û wijdanî ve pêvajo baş bi rê ve naçe û got, “Ji bo sererastkirinan komîsyonek ava bû lê belê ji vê komîsyonê biryarek derneket. Mafê jiyanê mafê bingehîn e. Dema mafê jiyanê nebe, edalet bi derengî bi cih bê jî wê encama xwe nebe. Têkildarî girtiyên nexweş divê tavilê biryar bê dayin. Girtîhiştina wan bi kêrî kesî nayê. Lewma divê tavilê rewşa wan bê sererastkirin, başkirin.”
