Komînal ku rojnameya mehane ya polîtîk û îdeolojîk e, hejmara xwe ya Îlonê bi manşeta ‘Çareserî bi her kesî dide qezençkirin’ weşand. Nivîsa sereke ya rojnameyê ku pêvajoya siyasî dinirxîne, ji aliyê Mûstafa Karasû ve hate nivîsîn. Karasû di nivîsa xwe de lêgerîna çareseriyê ya Rêber Apo, çarçoveya desteyên hatine avakirin, hevsengiyên li Rojhilata Navîn û xwedîderketina gel a li şehîdan nirxand.
Karasû got, “Rêber Apo bi nêzîkatî û hêza xwe ya çareseriyê hewl dide rewşa ‘qezenç bike-qezenç bike’ biafirîne. Naxwe ne Rêberekî bê xapandin e, ne jî Rêberekî bixapîn e. Di rewş û asta heyî de dîtina Kurdan a bi rengekî bêçare û mehkûm nedîtina rastiyan e” û diyar kir ku çareserî wê bi her kesî bide qezençkirin, neçareserî jî wê bi dewleta Tirk bide windakirin.
Di hejmara Îlonê de Mûrat Karayilan jî bi sernavê “Girîngiya dîrokî ya Şoreşa Vejînê û bandora wê ya li ser vê serdemê” nivîseke berfireh nivîsî. Di nivîsê de ku dîroka Tevgera Azadiyê bi berfirehî hate nirxandin Karayilan ji Pêngava 15’ê Tebaxê heta bi roja îro lêgerînên çareseriyê û rêveçûna şer nirxand. Karayilan her wiha cih da bîlançoya şehadetan a dîroka Tevgera Azadiyê ya Kurd.
Bi gotina “Eger em aştiyê pêk tînin divê qanûn jî li gorî vê be” Karayilan pêvajo nirxand û destnîşan kir ku heta Rêber Apo azad nebe Gerîlayên Azadiyê yên Kurdistanê wê xwe nedin ber danîna çekan.
Di hejmara Îlonê ya Komînal de her wiha nivîsa bi sernavê “Azadiya jinê bingeha azadiya civakî ye” ya Akademiya Zanistên Civakî ya Abdullah Ocalan, nivîsa “Şoreşa Fikrî ya Kurdan: Aqlê Kurd çawa bilind bû?” ya Xebat Andok, nivîsa “Li Kurdistanê hawara xwezayê” ya Alîşêr Hêlîn”, nivîsa “Ji perspektîfa dîroka komînal serdema rêgehê” ya Sînan Şahîn, nivîsa “Weke paradîgmaya çareseriyê entegrasyona demokratîk û civaka komînal a demokratîk” a Rojhat Roj û nivîsa “Li Kurdistanê şerê taybet û têkoşîna ciwanan” a Çiya Rizgar hate weşandin.
Di bergê dawî yê rojnameyê de helbesta bi navê “Li ser gerîla” ya şehîd Armanc Kerboranî (Huseyîn Akdogan) hate weşandin.
