Hevpeymaniya Hêzên Siyasî yên Rojhilatê Kurdistanê, têkildarî êrişên berdewam ên Îranê yên li ser kampên penaberên Rojhilatê Kurdistanê yên li Başûrê Kurdistanê, daxuyaniyek belav kir.
Daxuyaniya Hevpeymaniya Hêzên Siyasî wiha ye:
“Rejîma terorîst a Komara Îslamî ya Îranê, bi mebesta veşartina şikestên xwe yên siyasî, leşkerî, stratejîk û îdeolojîk ên di dema şerê 39 rojan yê li gel Amerîka û Îsraîlê d, bi berdewamî êrişî navend û baregehên partiyên Rojhilatê Kurdistanê û kampên niştecihbûnê yên malbatên kadro û pêşmergeyan yên li Herêma Kurdistanê kiriye. Tevî ku niha agirbest heye jî, ev êriş berdewamin.
Di êrişa herî dawî ya roja derbasbûyî 17’yê Nîsana 2026’an bi mûşek û dironeyan hat pêkanîn de, êrişî kampên sivîl û baregehên Partiya Demokrat a Kurdistana Îranê (PDKÎ) hate kirin. Mixabin di encamê de sê pêşmerge û têkoşerên rêya azadiyê yên vê partiyê bi navên Şahîn Azarberzîn, Neda Mîrî û Semîra Elahyarî şehîd bûn û du pêşmergeyên din jî birîndar bûn.
Komara Îslamî ya Îranê beriya niha jî, ji bilî navend û baregehên partiyên siyasî yên Rojhilatê Kurdistanê û cihên niştecîbûna malbatên wan, bi berdewamî êrişî Herêma Kurdistanê ki ku mixabin di wan êrişan de jî 11 kes bûn qurbanî û şehîd bûn.
Hevpeymaniya Hêzên Siyasî yên Rojhilatê Kurdistanê, bi awayekî tund vê sûcê û hemû êrişên terorîstî yên Komara Îslamî yên li ser têkoşerên Rojhilat û şehîdkirina 10 zarokên têkoşerên partiyên endamên Hevpeymaniyê, şermezar dike.”
Hevpeymaniyê bi çend xalan bang kir:
1- Em bang li hikûmeta Iraqê dikin û radigihînin ku divê helwest û bertekên cidî raber bikin, her wiha ji bo parastina jiyana penaberên siyasî û rêgirtina li dubarebûna van sucan, pêngavên pratîkî, yasayî û eşkere biavêjin. Parastina serweriya axê û jiyana niştecihên Herêmê erkeke destûrî ye, bi taybet ku Komara Îslamî ya Îranê peymana ewlehiyê ya di navbera her du welatan de binpê kiriye.
2- Em rexneyên tund li nûnertiya Neteweyên Yekbûyî (NY) ya li Iraq û Herêma Kurdistanê dikin. Em di wê baweriyê de ne ku bêdengî û bêçalakbûna wan li hemberî van sûcên şer û paşguhkirina erkên wan ên mirovî, destê rejîma Tehranê ji bo destdirêjî û teroreke zêdetir vekiriye. Ji ber wê em daxwaz dikin û pêwîste ku ev êriş wek sûcê şer û terora navdewletî werin naskirin, werin tomarkirin û li hemberî wan helwest were girtin.
3- Em bi tundî rexne li siyaseta lihevkirin û bazariya welatan a bi Komara Îslamî re dikin û tekezî li ser wê rastiyê dikin ku vê rejîma dîktator ewlehî û aramiya hemû cîhanê kiriye rehîn. Her dem ji bo kirîna demê û birina pêş a armancên xwe, danûstandin û lihevkirinên bi civaka cîhanî re bi kar aniye. Lewma dema wê hatiye ku Konseya Ewlekariyê ya Neteweyên Yekbûyî bertekeke bilez nîşan bide û civaka navdewletî bi lihevkirina li gel Tehranê re, êdî destê rejîmê ji bo berdewamiya teror û kuştinê vekirî nehêle.
4- Em bang li hemû Kurdên li derveyî welat dijîn dikin ku bi plan û bernameyên xurt, bi rêxistinkirina çalakî û meşên aştiyane û bi rengekî berdewam derkevin qadan, bi kombûnên li ber balyozxane û konsolxaneyên rejîmê û navendên biryardanê, dengê nerazîbûna neteweya me bilind bikin.
Di dawiya daxuyaniyê de, Hevpeymaniya Hêzên Siyasî yên Rojhilatê Kurdistanê got: “Em careke din ji bo dost û dijminan piştrast dikin ku ev êriş û canbexşîn û qurbaniyên hêzên me, vîna me nahejîne belku baweriya me ya bi rewatiya xebata ji bo rizgariya Kurdistanê û hilweşandina vê rejîmê û biryardariya me ya li ser berdewamiya têkoşînê xurtir dike.
Şehîd namirin û serkeftin ji bo rêya azadiyê.”
