Partiya Yekitiya Demokratîk (PYD) bi armanca xurtkirina yekrêzî û rêgirtina li ber gotinên nefretê komcivînek li dar xist. Komcivîn bi dirûşma “Werin em ji bona yekrêziyê û dengê Kobaniyan bixebitin û “Em ji bo redkirina gotinên nefretê û tundutujiyê û parastina aştiya civakî bixebitin” pêk hat. Di civînê de rewşa Kobanê, pêşdeçûnên peymana 29’ê Çileyê ya di navbera QSD û hikumeta demkî ya Sûriyeyê, her wiha mijara entegrasyonê hatin nîqaşkirin. Komcivîn li Eywana Firatê ya bajarê Kobanê bi beşdariya şênî, endamên saziyan, meclis û partiyên siyasî û rûspiyên eşîrên herêmê pêk hat.
Komcivîn bi deqeyek rêzgirtin dest pê kir. Piştre wêjevanê ji Kobanê Hisên Mihemed Elî axivî. Mihemed Elî piştî bixêrhatina beşdaran kir got: ” Em ji bo çareserkirinê li vir kom bûne. Dûra em dê rewşa niha û pêvajoya ku em tê re derbas dibin jî nas bikin. Niha divê em ji gelê xwe re bibin hêvî.”
Her wiha anî ziman ku “li seranserî Kurdistanê 29 şoreş hatin lidarxisti, em jî parçeyek ji wan û ji mîrateyê ne. Li beramberî wê destkeftî û serkeftin hatin bi destxistin, divê em van destkeftiyan biparêzin.
Piştî wê ji aliyê parêzer Ferhad Baqir geşedanên heyî hatin şîrovekirin û got: “Hin xalên ku divê êdî rewşa Kobanê bê zelalkirin û divê di mijara entegrasiyonê de demildest kar bê kirin.”
Piştre endama Meclisa Têkiliyan a PYD’ê Leyla Ehmed axivî û got: “Kobaniya me xwediyê wê taybetmendiyê ye ku dîrok nivîsand û ji tevahî cîhanê re bûye îlham. Kobanê bû cihê ewil yê tunekirina DAÎŞ`ê. Divê em jî xwedî li vî bajarê derkevin.”
Hevseroka Zanîngeha Kobanê Xezne Ibrahîm jî axivî û anî ziman “divê em bibin cihê çareseriyê ji bo bikeve xizmeta tevahî gelê me.”
Dûra jî gelek nîqaş têkildarî mijara entegrasyonê hatin kirin.
Di civînê de komîteyek ji 31 kesan hat avakirin da ku der barê dozên girêdayî Kobanê de dan û standinan bi hikûmeta demkî re bike.
