DEM Partî, CHP, EHP, EMEP, TÎP, TOP û pêkhateyên DEM Partiyê bi armanca hevdîtinê bi Hevserokê Giştî yê HDP’ê yê berê Selehattîn Demîrtaş û Hevşaredarê Bajarê Mezin ê Amedê ya berê li şûna wî qeyim hatiye tayînkirin Selçuk Mizrakli pêk bînin, çûn Girtîgeha Edîrneyê. Li ser navê şandeyê parêzer bi Selahattîn Demîrtaş û Selçûk Mizrakli re hevdîtin pêk anîn. Piştî hevdîtinê şande li pêşiya girtîgehê daxuyanî da. Hevserokê DEM Partiyê ya Giştî Tuncer Bakirhan, Serokên giştî yên partiyên siyasî, parêzerên Demîrtaş, rêxistina DEM Partiyê ya Edîrneyê û gelek welatî tevlî daxuyaniyê bûn.
Di daxuyaniya hatiye dayîn de peyama Selehattîn Demîrtaş û Selçûk Mizrakli ya bi rêya parêzeran şandiye hate xwendin. Peyam ji aliyê Cîgira Hevserokên Giştî ya DEM Partiyê Ozlem Gunduz ve hate xwendin.
Selahattîn Demîrtaş û Selçûk Mizrakli di peyama xwe de tevahî gel û dostan silav kirin û wiha gotin: “Em gelek baş û bimoral in. Geşedanan ji nêz ve dişopînin. Divê herkes bizane ku em ji bo derketina derve rojan najmêrin. Xistina me ya girtîgehê çiqas polîtîk be dê derketina me jî wisa be. Hessasiyeta me ya herî mezin rawestina şer û rewestandina kuştinan bû. Me niha ev yek pêk aniye. Em hêvî dikin ku bi derxistina zagonan ev rewş mayînde bibe. Lê belê têkoşîna demokrasî dê piştî vê geş bibe û pêş bikeve. Em li ku bibin jî bo bihêzkirina siyaseta demokratik çi ji destê me were em ê bikin. Guherînên mezin li pêşiya Tirkiyeyê ne. Ji bo ev guherîn li gorî gelê me û kedkaran pêk were, pêdivî bi yekitiyên xurt ên têkoşînê heye. Îro hevhatina li vê derê jî nişan dide ku dê ev têkoşîn di her şert û mercan de wê mezin bibe. Ji ber vê yekê jî em yek bi yek spasiyên xwe li partiyên siyasî dikin, silav û hezkirinên xwe yên ji dil dişînin. Bi hêviya em di siberojên azad de hev bibinîn.”
