Li gelek bajar û bajarokên Bakur û Rojhilatê Sûriyeyê li hemberî êrîşên li ser taxên Şêxmexsûd, Eşrefiyê û Benî Zêdê yên Helebê daxuyanî hatin dayîn û çalakiyên protestokirinê hatin lidarxistin. Di çalakî û daxuyaniyan de êrîş hatin şermezarkirin û hate diyarkirin ku ji êrîşên çeteyên girçdayî dewleta Tirk Hikûmeta Veguhêz berpirsiyar e. Her wiha hate destnîşankirin ku êrîş, sûcên li dijî mirovahiyê ne û hate diyarkirin ku gelê herêmê tu caran têk naçe.
TIL TEMIR
Li Til Temirê bi sedan kesî bi xwepêşandaneke girseyî êrişên li dijî taxên Helebê şermezar kirin û hevgirtina xwe bi berxwedana şêniyan re anî ziman.
Li pêş avahiya Meclisa Malbatên Şehîdan xwepêşandan veguherî mitîngê û di axaftinan de hate diyarkirin ku ev êrişên nikarin îradeya gelên azad têk bibe û hewlên têkbirina aramî û ewlehiyê wê li hember hevgirtina gelê herêmê û berxwedana wan bin bikevin.
Çalakî li gel diruşmên silavkirina berxwedana gel û Hêzên Ewlekariya Hundirîn-Helebê bi dawî bû.
HESEKÊ
Li Hesekê ji aliyê Mala Jinan û Gerînedeta Tenduristiyê daxuyaniyên cuda hatin dayîn û di daxuyaniyan de êrîşên li ser tax, nexweşxane û navendên tenduristiyê bi tundî hatin şermezarkirin.
Di daxuyaniyan de hate diyarkirin ku ev êrîş li pêş çavên civaka navneteweyî tên kirin û êşa welatiyên sivîl kûrtir dikin.
DIRBÊSIYÊ
Li Dirbêsiyê jî li gel beşdarbûna gel, xwendekar, rêxistinên civakî û tevgerên jin û ciwanan meşek hate lidarxistin. Di axaftinan de êrîş hatin şermezarklirin û hate îfadekirin ku bêdengiya civaka navneteweyî ya li hember van sûcan tê wateya hevkariyê.
HOL
Li Holê bi pêşengtiya Partiya Yekitiya Demokratîk û Meclisa Bajêr li pêşiya Komeleya Perwerdê bi beşdariya bi dehan welatiyan xwepêşandanek hate lidarxistin. Di çalakiyê de êriş hatin şermezarkirin û hate diyarkirin ku ev êrîş xizmeta hêzên derve dikin û armanca wan ew e ku di nava gelên Sûriyeyê de fitne were derxistin.
Hate destnîşankirin ku li hemberî êrîşên berbehs wê berxwedana gelê herêmê berdewam bike.
ŞEDADÊ, TİL BİRAK Û TİL HEMÎS
Li Şedadê, Til Birak û Til Hemîsê jî çalakî hatin lidarxistin. Di çalakiyan de êrîşên li ser taxên Helebê hatin şermezarkirin. Di daxuyaniyên hatine dayîn de hate diyarkirin ku wê berxwedana gel hemû planên êrîşê têk bibe û bang li jin, ciwan û hemû beşên civakê hate kirin ku têkoşîna aşitiyane û piştevaniyê xurt bikin.
Hemû çalakiyên ku hatin lidarxistin, li gel berzkirina dirûşmeyên ku berxwedana gelên Şêxmeqsûd, Eşrefiyê û Benî Zêdê silav dikin, bi dawî bûn.
REQA
Li bajarê Reqayê jî gelek welatiyên sivîl, saziyên sivîl û leşkerî û nûnerên siyasî li pêşiya Eywana Mişwar a Reqayê kom bûn û êrîşên li ser taxên Helebê protesto kirin.
Girse heya Xaçerêya Panaromayê meşiya û dirûşmeyên ku silavkirina bexwedanê û şermezarkirina êrîşan hatin berzkirin.
Di axaftinan de êrîşên li ser welatiyên sivîl hatin şermezarkirin û bang li civaka navneteweyî hate kirin ku van êrîşan bide rawestandin. Her wiha bang li Hûkûmeta Veguhêz hate kirin ku krîza mirovî ya sivîlên ku ji Efrînê koçî Şehbayê kirine û dubare neçar mane ku koç bikin, paşguh neke.
