Pêkhateyên Peoples’ Caravan (Karavana Gelan) ku ji bajarên cur be cur ên Ewropayê bi rê ketin û li Pirsûsê heya sînorê Kobanê çûn, hem li dijî êrîşên li ser Rojava hem jî li dijî tecrîda li ser Rêber Apo dengê xwe bilind kirin. Aktîvîstên enternasyonalîst Zozan û Magda yên ku di karwanê de cih girtin, ji ANF’ê re axivîn.
‘ME XWEST DORPÊÇA LI SER KOBANÊ BIŞKÎNIN’
Endama Tora Jinên Siberojê Dihûnin (Network of Women Weaving the Future) û pêkhateya Karwanê Gelan, Zozan sedemê tevlîbûna xwe ya karwanê bi van gotinan anî ziman:
“Ji ber rewşa li Rojava, bi taybetî jî ji ber rewşa li Kobanê em tevlî Karwanê Gelan bûn. Mirovên li wir zêdeyî 25 rojan bê elektrîk, bêav û bêxwarin bûn. Bi rastî jî di şert û mercên pir zehmet de jiyan dikirin. Gelek mirov neçar man ji derve bimînin. Lewma me xwest dorpêça li ser Kobanê bişkînin.”
Zozan diyar kir ku ji Elmanya, Fransa, Îtalya, Sirbistan û Yewnanistanê aktîvîst hatin ba hev û ber bi Tirkiyeyê ve bi rê ketin û gihiştin Pirsûsê.
‘ME XWEST BER BI DÎROKÊ VE GAVEK BAVÊJIN’
Magda ya ji Parîsê tevlî bû jî, destnîşan kir ku rêwitiya wan ne tenê mirovî, xwedî berpirsyariyeke dîrokî jî ye û ev tişt got:
“Em gihiştin Stenbolê, piştre çûn Pirsûsê. Em gihiştin sînor û bi biryar bûn ku derbasî Kobanê bibin. Di dîroka mirovên ku ji bo tevlîbûna vê şoreşê û parastina gel hatine ba hev de, me jî xwest gavekî bavêjin.”
Magda diyar kir ku tevî xeteriya girtinê jî, ew bi biryardarî bi rê ketin û got, “Dîsa jî em pir nêz bûn.”
‘ROJAVA MÎNAKA ŞÊNBER A JIYANA BI HEV RE YE’
Zozan û Magda dema bi Karwanê re vegeriyan, tevlî meşa ‘Ji Rêber Apo re azadî, ji Rojava re statu’ ya li Strasbourgê bûn. Her du enternasyonalîst têkildarî tecrîda li ser Rêberê Gelê Kurd Abdullah Ocalan axivîn û gotin, yek ji sedemên tevlîbûna çalakiyên li Strasbourgê jî azadiya Rêber Apo ye. Zozan got, “Rêber Apo sala borî banga aştî û civaka demokratîk kir. Got, bi dewleta Tirk re, bi gelên Tirkiyeyê re û hemû gelên li wir dijîn re jiyaneke demokratîk a bi hev re pêkan e. Rewşa li Rojava mînaka vê ya şênber e. Sûriyeyî, Elewî, Êzidî, Kurd, Ereb, Durzî bi hev re dijîn. Ev paradîgmaya Rêber Apo ye. Lewma em azadiya wî dixwazin. 27 sal in li Îmraliyê di bin tecrîdê de ye.”
‘LI EWROPAYÊ ÎRADEYA JIYANA BI HEV RE MEZIN DIBE’
Magda jî anî ziman ku ji Kurdistanê heya Ewropayê mirov li dora îradeya jiyana hevpar seferber bûne û got:
“Li Kurdistanê, Tirkiye, Ewropa û Strasbourgê mirov ji bo xwesteka jiyana bi hev re ketin nava liv û tevgerê.”
Pêkhateyên Karavana Gelan li dijî dorpêça li ser Rojava û tecrîda li ser Rêber Apo, ji bo mezinkirina piştevaniya navneteweyî bang kirin.
