Li Postaneya Mezin a Dagkapi ya li navçeya Sûrê, bi şîara “Em ê bi jina azad civaka demokratîk ava bikin” çalakî hate lidarxistin. Ji partiya siyasî û rêxistina civaka sivîl gelek jin beşdarî çalakiyê bûn.
Hevseroka MED TUHAD-FED’ê Pinar Sakik Tekîn axivî û bi bîr xist ku Rêber Apo pir girîngî dide têkoşîna azadiya jinê û got, perspektîfa wî ya azadiya jinê wê ji têkoşîna wan re bibe ronahî.
Pinar Sakik Tekîn biryara Komîteya Wezîran a Konseya Ewropayê ya têkildarî “mafê hêviyê” bi bîr xist û destnîşan kir ku azadiya Rêber Apo û ya civakê ji hevdû cuda nayê fikirîn.
Parlamentera Mêrdînê ya DEM Partiyê Bêrîtan Guneş Altin jî diyar kir ku jinên li girtîgehê ji bo azadî û aştiyê li ber xwe didin û got, ew ê ji bo rojên azad têkoşîna xwe her tim bilind bikin.
Piştî axaftinan, jin bi berzkirina dirûşmeyan ketin avahiya PTT’ê û 76 qertpostal ji jinên girtî re şandin.
