JKŞ’ê bi wesîleya 8’ê Adarê Roja Jinên Kedkar ên Cîhanê daxuyaniyeke nivîskî da, bal kişand ser têkoşîna ji bo azadiya jinan û hemû jinên berxwedêr ên li seranserê cîhanê silav kirin.
Naveroka daxuyaniya Jinên Komunîst ên Şoreş ger bi vî rengî ye:
‘’Em hêza xwe ji dîrokê digirin. Wekî ku em hemû dizanin 8’ê Adarê Roja Jinên Kedkar ên Cîhanê, roja serhildana jinên karkerên werşe ya li dijî kedxwarî, bêedeletî û newekhewi ye. Di vê dîrokê de 129 jinên karker bi şewitînê jiyana xwe ji dest dan, lê belê dîsa jî koletî qebûl nekirin.
Îsal ji bo me jinên Rojava bi şerî dest pê kir. Çeteyên dagirker û cîhadîst ên HTŞ’ê, li taxên Şêxmeqsûd û Eşrefiyê bi hovîtî êrîşî şoreşa jinan kirin. Şervanên YPJ-YPG’ê di parastina şoreşê de bi fedayî cih girtin. Çeteyên ku hersa wan kêm nebû, bi avêtina cenazeyê hevala Deniz a endama Asayîşê ya ji balkona qata 3’yan xwestin ku ji jinan re sînoran diyar bikin. Vê têrê nekir. Ji ber ku Dewleta Tirk bi şandina tûgayên leşkeran, çek û cebilxaneyan, tunekirina şoreşê armanc kir. Heta nêzî gundê Til Baroud ê Hesekê û gundewarên Qamişloyê hatin. Tebqa û Reqa girtin. Endamê çeteyan yê bi navê Yusuf (Rami) El Dehîş, bi vîdeoya ku bi niyeta “xenîmeta şer” parve kirî û têde dibêje, “Porê hevalê ye, min ji Reqayê aniye; jixwe miriye, lê porê wê saxlem maye”, di rastiyê de îdeolojiya hov a ku temsîl dike teşhîr kir.
Li Kobanê heta Şêxler û Çelebiyê hatin. Dixwazin tola têkçûna xwe ya dîrokî ya sala 2015’an hildin. Lewra ji wê rojê û vir ve Kobanê ne tenê bajarek e. Kobanê sembola azadiya jinan û berxwedana li dijî faşîzmê ye. Navê têkoşîna dîrokî ya li dijî tariya DAÎŞ’ê ye. Cih û warê Sarya Ozguran û Revanan e. Îro ev bajarê sembol, bi çekên giran, bi êrîşên hewayî û bi çeteyan hatiye dorpêçkirin. Ji ber vê yekê, jinên ku li Kobanê li ber xwe didin, ne tenê xaka xwe, di heman demê de rûmeta hemû mirovahiyê jî diparêzin.
Ji Dêrikê heta Qamişloyê, ji Kobanê heta Hesekê, ji Dirbêsiyê heta Amûdê, ji Çilaxa heta Tirbespiyê, li tevahiya Rojava weke jinan, em di nobetê de bûn. Me tabûrên jinan ava kirin; wek pîr, jin û jinên ciwan me taxên xwe parastin. Yên ku nedikarîn li ser piyan bisekinin, xwarin çêkirin û şandin çeperên şer, me cebilxane tijî kirin. Li dijî şerê reşkirinê yê li ser medyaya civakî, em bûn yek û me rûpelên çeteyan dan girtin. Em keda xwe dizanin û lê xwedî derdikevin.
Em weke Jinên Komunîst ên Şoreşger soz didin: Ji bo xurtkirina rêxistiniya xwe, ji bo parastina destkeftiyên jinan, em ê bi şev û roj bixebitin. Ji bo destkeftiyên ku me di qada siyasî de bi dest xistine, bixin nava malan, em ê bi hemû hêza xwe têbikoşin. Em dibînin ku hêza me ji yekîtiya me tê. Ji ber vê yekê, li çar parçeyên Kurdistanê, li Sûriyeyê, di yekîtiya jinên Elewî û Durzî yên ku li dijî zilma çeteyan li ber xwe didin de, em henê.
8’Ê ADARÊ JI BO JINAN TÊ WATEYA BERXWEDAN U TÊKOŞÎNÊ
Di 8’ê Adarê Roja Jinên Kedkar ên Cîhanê de em ê li qadan bin. Em ê îsal û piştî vê, derfetên mezinbûna berxwedanê mal bi mal, derî bi derî zêde bikin. Li dijî çeteyên cîhadîst ên HTŞ’ê û Dewleta Tirk a ku wan xwedî dike, em ê qadên xwe biparêzin. Li hemberî qetilkirina jinan, teşhîrkirina bedenên wan, revandina wan û tundiya li ser zarokan, em ê bêdeng nemînin. Em ê xwedî li destkeftiyên jinan derkevin û wan biparêzin. Cîhaneke mezin heye ku em ê qezenc bikin. Em sînorên ku ji bo me hatine xêzkirin nas nakin. Em red dikin ku bedena me bibe qada şer. Çawa ku perçikên (hûnandinên) porê me bûn sembola berxwedanê, dengê me yê ku dibêje ‘em natirsin’ û yekîtiya me jî dê bibe sembola serketina me.
Silav li jinên ku ji Îranê heta Filistînê, ji Iraqê heta Afganistanê, ji Hindistanê heta tevahiya cîhanê li ber xwe didin. Silav li jinên ku îsal wê ji bo 8’ê Adare derkevin qadan. Bi vê siyaseta qirkirin, tasfiyekirin, înkar û îmhayê, dixwazin mayindebûna cîhana serdestiya mêr mîsoger bikin. Têkoşîna me pîroz û pir girîng e. Em dîrokê dinivîsînin. Dawiya tariyê ronahî ye. Em ê ronahîye bi deste xwe bînin.”
