Êrîş û bombebaranên rejîma Îranê yên li ser kampên penaberên Rojhilatê Kurdistanê yên li Başûrê Kurdistanê berdewamin.
Di saetên nîvro de, kampa Surdaş a li sînorê bajarokê Dukan a ser bi parêzgeha Silêmaniyê, bi mûşekan hat bombebarankirin.
Endamê Desteya Rêveber a Komeleya Zehmetkêşanî Kurdistanê Emced Huseyn Penahî ji Rojnewsê re axivî û ragihand ku îro saet 13:24’an de bi rêya du mûşekan êrişî ser Kampa Surdaş ya li sînorê bajarokê Dukan a ser bi parêzgeha Silêmaniyê hat kirin.
Emced Huseyn Penahî da zanîn ku di encama êrîşê de ti ziyanên canî çênebûye, lê zerar û ziyanên madî bi kampê ketiye.
Hêjayî gotinê ye ku Kampa Surdaş yek ji kampên niştecihbûnê ya Kurdên Rojhilatê Kurdistanê yên penaberî Başûrê Kurdistanê bûne ye. Niştecihên kampê di çarçoveya lihevkirina ewlehiyê ya di navbera hikûmeta Herêm û Iraqê li gel Komara Îslamî ya Îranê de li wir hatine bi cihkirin. Di dema borî de û taybet piştî destpêkirina şerê di navbera Îran û DYE-Îsraîlê de, êrîşên bi drone û mûşekan li ser kampê hatine pêkanîn.
