Festîvala Çanda Kurd a Navneteweyî ya 34’emîn îsal di 5’ê Îlonê de li bajarê Dortmund ê Elmanyayê bi dirûşma “Bi Rêbertiya Azad ber bi Civaka Demokratîk” ve tê lidarxistin û diyarî Şehîdên Azadiyê yên Kurdistanê tê kirin.
Hevserokê Kongreya Civakên Demokratîk a Kurdistaniyên li Ewropayê (KCDK-E) Engîn Sever amadekariyên festîvallê nirxand û anî ziman ku festîval wê bibe kombûneke girîng a gelê Kurd. Sever diyar kir ku li welatên cuda yên Ewropayê amadekarî ji bo festîvalê têne kirin û işaret bi girîngiya tevlîbûna malbatan, ciwanan û jinan a li festîvalê kir.
Sever bal kişand ser meşa ku di çarçoveya festîvalê de bi pêşengiya ciwanan bê lidarxistin û anî ziman ku meş wê ji Kolnê destpê bike û li qada festîvalê ya li Dortmundê biqede. Sever destnîşan kir ku ciwan parçeyekî girîng ê karên pêvajoya festîvalê ne. Engîn Sever ragihand ku ji bajarên cuda yên Ewropayê wê ciwan beşdarî meşê bibin û got, piştî ku meş li qada festîvalê bi dawî bû wê bi bernameya festîvalê re bibe yek.
Hevserokê KCDK-E’yê anî ziman ku amadekariyên festîvalê heta roja dawî dewam dikin û li Fransa, Hollanda, Swîsre û welatên din ên Ewropayê kar hate meşandin. Li gorî agahiyên ku Sever da, li qada festîvalê li gel çalakiyên çandî wê karê ciwanan û civakî jî bêne lidarxistin û işaret bi girîngiya tevlîbûna civaka Kurd a li Ewropayê ya li festîvalê kir.
Di axaftina xwe de Engîn Sever bang li gelê Kurd ê li Ewropayê bi taybetî jî malbat, ciwan û jinan kir ku 5’ê Îlonê li Dortmundê beşdarî Festîvala Çanda Kurd a Navneteweyî ya 34’emîn bibin û got, “Bi vê tevlîbûnê re em qada festîvalê bikin qada xwedîderketina li şehîdan, qada nîşandana çanda Kurd, qada bilêvkirina daxwaza azadiya Rêber Apo, qada xwedîderketina li paradîgmaya Rêber Apo.”
