Parlamentera Sêrtê ya DEM Partiyê Sabahat Erdogan Saritaş destnîşan kir ku divê dest ji pratîka qeyûm a li derveyî hiqûqê bê berdan ku bûye deqeke reş li dîroka Tirkiyeyê û destnîşan kir ku yên gel û îradeya wê nas neke wê têk biçe.
Parlamenter Sabahat Erdogan Saritaş têkildarî desteserkirina şaredariya Sêrtê ji ANF’ê re axivî û got, “Li Amedê doza hevşaredara me hebû. Ji ber karên wê yên rojnamevaniyê ceza lê birîn. Em baş zanin ku ev doz bi bayê bezê hate biencamkirin. Serê sibehê jî qeyûm danîn ser şaredariyê. Ji wan heye ku dema qeyûm di tarîtiyê de danîn wê veşartî bimîne, kes wê nebihîze. Mejiyê wan ê tarî ev pratîk nîşan da. Em ê jî careke din nehêlin ku îradeya me tine bê hesibandin. Em ê têkoşîna xwe heta dawiyê dewam bikin.”
‘WÊ TÊK BIÇIN’
Sabahat Erdogan Saritaş anî ziman ku sê dem in qeyûm li Şaredariya Sêrtê tê danîn, bi vî rengî êrîş li îradeya gel tê kirin û got, “Yên ku îro îradeya gel nas nakin, di her hilbijartinê de biçûk bûn û ev karmendê diz di bêrîka xwe de gerandin. Yên ku îradeya gelê Kurd nas nekin, yên ku nasname, çanda gelê Kurd nas nekin wê têk biçin. Lewma bi polîtîkayên durû yên ku ji aliyekî ve qala aştiyê dikin li aliyê din jî îradeya gel nas nakin, nikare gelê Kurd ji sekn û têkoşîna wê vegerîne. Em ji aştiyeke bi rûmet re her tim amade ne, lê belê em ê têkoşîna xwe li hemberî biryarên bêhiqûqî jî dewam bikin. Kes nikare îradeya gelê Kurd teslîm bigire.”
‘DEST JI PRATÎKA DERVEYÎ HIQÛQÊ BERDIN’
Sabahat Erdogan Saritaş anî ziman ku yên dîroka berxwedanê ya Botanê ji nedîtî ve tên û hewl didin gelê Kurd teslîm bigirin, her carê li rastiya gel diqelibin û got, “Eger hûn qala xwişk û biratiya sed salî ya Kurd û Tirkan dikin, hûn neçar in vê îradeya gel nas bikin. Hûn vê îradeyê nas nekin hûn ê winda bikin. Vê pratîka qeyûm a li derveyî hiqûqê ku bûye deqeke reş li dîroka Tirkiyeyê tavilê betal bikin. Yên ku gel û îradeya wê nas neke wê têk biçe.”
‘TALANKAR Û DIZ IN’
Parlamentera Sêrtê ya DEM partiyê bang li civaka Tirkiyeyê jî kir ku li hemberî vê biryara bêhiqûqî li gel gelê Kurd tevbigere û got, “Ji ber ku qeyûm ji bo talan û diziyê hatiye Kurdistanê. Bang li her kesî dikim ku bi navê aştiyê li gel me têbikoşin.”
