Kongra Star ji bo piştgiriya serhildanên jinên çalakvan û yên feminist ê Abya Yala yên li hemberî kiryarên hikumeta Ekvador (Ecuador) ku bi salane serî hildane, her wiha ji bo silavkirina berxwedanan gelê ku mafê xwe yê rewa dixwazin û têkoşîn dikin daxuyaniyek da.
Daxuyanî li Stada 12`ê Adarê ya li bajarê Qamişlo ji aliyê Berdevka Komîteya Perwerdeyê ya Kongra Star Rohlat Muslim ve hate xwendin.
Naveroka daxuyaniyê wiha ye:
“Ji dilê têkoşîna me ya jinan, em hevgirtina xwe bi jin û gelê Abya Yala re ya têkoşîna wan a ji bo jiyan û rûmetê radigihînin. Em, wek Kongra Star bi banga xwişk û gelên xwecihî yên li parzemîna Abya Yala, dengê xwe yê piştgiriyê ji bo greva neteweyî ya adil li Ekwadorê û ji bo têkoşînên gelêrî yên ku nêzîkatiya mêtingeran a Neoliberal a ku zilm û tundûtûjiyê ji nû ve hilberîne red dikin.
Ji pozîsyona berxwedana jin a me li Rojavayê Kurdistanê, em li bûyerên ku li Kantona Îmbabura û Paytexta Ekwadora Quito û bajarên din ên Ekwadora diqewimin temaşe dikin. Em leşkerîkirin û zexta sîstematîk a ku ji hêla dewletê ve li dijî xwepêşanderan, bi taybet gelên xwecihî û jinên ku di parastina jiyan, erd, edalet û rûmetê de di rêza yekem de ne, bi tundî şermezar dikin.
Em kiryarên hikûmeta Daniel Noboa, di nav de şandina bi hezaran leşkeran, dorpêçkirina paytext, serdegirtina nexweşxane û taxan, înkarkirina lênihêrîna bijîşkî, wekî sûcek li dijî mirovahiyê û terorîzma dewletê li dijî gelên ku daxwaza mafê xwe yê jiyaneke azad û bi rûmet dikin, dibînin.
Biryara Yekîtiya Neteweyên Resen ên Ekwadorê (CONAIE) ya banga greveke neteweyî ne tenê rewa ye, lê di heman demê de pêwîstiyeke dîrokî ye li hember birçîbûn, îstismar û talankirina jîngehê. Gelên marjînalîzekirî ne mijarek ne gengaz, lê mijarê eşkere dixwazin: mafê erd, av, tenduristî, perwerde û xwerêvebirinê.
Em, wek Kongra Star, girtinên girseyî, bikaranîna gaza jehrî li dijî zarokan û çewisandina civakan a ku ji bo parastina xwe radibe ser piyan, şermezar dikin.
Em hikumeta Ekwadorê ji ber tawanên wê yên li dijî xwepêşanderên aştiyane bi tevahî berpirsiyar dibînin. Em têkoşîna jinên Quechua, Caranqui û hemû jinên xwecihî yên ku di pêşengiya berxwedanê de ne û wateya rastîn a hêz û rûmetê temsîl dikin silav dikin. Berxwedana wan îlhamê dide me û tîne bîra cîhanê ku şoreş bi axê, bi laş, bi dayikan û bi jinan dest pê dike.
Em Kongra Star, soza xwe ya ji bo rawestana li kêleka jinên Abya Yala û gelê wê yê têkoşer nû dikin. Em bang li civaka navneteweyî, rêxistinên jin, demokratîk, ekolojîk û tevgerên civakî yên li çar aliyê cîhanê dikin ku dengê xwe bilind bikin û hewlên xwe bikin da ku bi Ekwadorê re û bi hemû gelên ku ji bo edalet û azadiyê têdikoşin re hevgirtî bin.”
