AMED: Şaxa Amedê ya ÎHD’ê û xizmên windayan, di hefteya 903’yan a çalakiya “Bila winda bên dîtin, faîl bên darizandin” de, li ber Bîrdariya Mafê Jiyanê ya li Parka Koşuyolu ya navçeya Rezan hatin ba hev. Di çalakiyê de wêneyên kesên di bin çavan de hatine windakirin û qetilkirin, hate hildan. Aqûbeta Vasif Ozturk hate pirsîn ku 1’ê Hezîrana 1994’an li navçeya Pasûr a Amedê ji aliyê leşkerên Tugaya Bolu ve hate binçavkirin û piştre agahî jê nehate wergirtin. Daxuyanî bi çalakiya rûniştinê bi dawî bû.
ÊLIH: Li Êlihê di hefteya 739’an de li ber Bîrdariya Mafên Mirovan a li Cadeya Gulistan çalakî hate lidarxistin. Di çalakiya vê hefteyê de, aqûbeta Îsa Gok hate pirsîn ku Hezîrana 1994’an li Êlihê hate windakirin. Daxuyanî bi çalakiya rûniştinê bi dawî bû.
RIHA: Li Rihayê di hefteya 75’an de li ber Novada Park AVM’ê çalakî hate lidarxistin. Di çalakiyê de wêneyên windayan hatin hildan, gelek parêzvanên mafên mirovan tevlî çalakiyê bûn. Vê hefteyê aqûbeta Mustafa Saygi hate pirsîn ku li navçeya Pirsûs a Rihayê di bin çavan de hate windakirin. Daxuyanî bi çalakiya rûniştinê bi dawî bû.
COLEMÊRG: Şaxa Colemêrgê ya ÎHD’ê di hefteya 229’an de çalakiya xwe ya di çarçoveya 17-31’ê Gulanê Hefteya Windayên Di Bin Çavan De daxuyanî da çapemeniyê. Aqûbeta Serokê Desteya Teftîşê ya Wezareta Tenduristiyê Namik Erdogan hate pirsîn ku 8’ê Gulana 1994’an hate qetilkirin.
