Çalakiya ku gelek nûnerên saziyên sivîl û siyasetmedar beşdar bûn de pankarta “Azadî ji girtiyan re, aştiya civakî” hat vekirin.
Hevseroka MED TUHAD FED’ê Pinar Sakik Tekîn diyar kir ku tevî rewşa bê pevçûnê jî li girtîgehan zext û tecrîd didomin.
Parlamentera Dersimê Ayten Kordubal kişand ser rewşa girtiyan û pêvajoyê û wiha got: “Em di pêvajoyekê de ne û dibêjin ku bila zindan werin valakirin lê her roj bi hincetên pûç li ser girtiyan zext pêk tên. Tevî pêvajoyê jî şert û mercên girtiyan ber bi xerabiyê ve dibin. Ji ber vê rewşê girtî jî ketine greva birçîbûnê.”
Endamê Komisyona Girtîgehan ê OHD’ê ya Amedê Suleyman Zaman diyar kir ku di demên dawî de lêgerîna rûtîn li dijî girtiyan zêde bûne û got, “Ji malbatên girtiyan re her roj dibêjin mevzuat guheriye û legerîna nav dev û tazî li girtiyan dikin. Girtiyên bi navê Nûrcan Aslan, Ardil Çeşme, Abdulmecît Yuksekbag, Mustafa Amutgan û Keleş Celal ji bo ku ‘poşmantî’ qebûl nekirine, berdana wan hatiye taloqkirin.”
Zaman diyar kir ku Lijneyên Îdarî û Çavdêriyê ferzkirina “poşmantiyê” kiriye amûrên zexta îdeolojîk, û hin girtî tevî ku cezayên xwe temam kirine jî nayên berdan. Zaman daxwazên xwe wiha rêz kir:
– Divê mafên tenduristî û ewlehiyê yên hemû girtiyan bên misogerkirin,
– Divê lêpirsînên siyasî û taloqkirina berdana girtiyan bi dawî bibin,
– Divê girtiyên ji sûcên cûda li heman deveran neyên girtin,
– Divê li girtîgehan sîstemeke şefaf û rêzê nîşanî rûmeta mirovan dide bê avakirin.
Di çalakiyê de wiha hat gotin, “Polîtîkayên tecrîdê yên li girtîgehan zirarê didin pêvajoya aştiya demokratîk” û daxwaza “Ji bo aştiya civakî divê li girtîgehan hiqûq bê meşandin.”
