Serokdewletê El Salvadorê Nayib Bukele reforma qanûna bingehîn a têkildarî girankirina cezayên zarokan xist meriyetê. Li gorî sererastkirina nû, ji bo sûcên weke cînayet, tecawiz û endamtiya çeteyan wê cezayê hepsa muebet li zarokên 12 salî û pê ve were birîn.
Reforma ku meha borî li parlamentoyê hate qebûlkirin, cezayê ji bo zarokan ê beriya niha jî ji holê radike ku beriya niha li zarokan herî zêde 60 cezayê hepsê dihat birîn. Di çarçoveya sererastkirina ku wê di 26’ê Nîsanê de bikeve meriyetê, wê dadgehên ku zarokê lê werin darizandin werin avakirin û cezayên muebetê piştî salên dirêj dubare werin kontrolkirin.
Ev pêngav weke dewameke polîtîkayên rewşa awarte ya di sala 2022’yan de ji aliyê Bukele ve hate îlan kirin û heya niha jî berdewam dike, tê nirxandin. Tê diyarkirin ku di pêvajoya berbehs de nêzîkî 91 hezar kes hatine girtin û ev yek tê wateya zêdetirî ji sedî 1’ê nifûsa welêt.
Rêxistinên mafên mirovan diyar dikin ku piraniya girtinên girseyî kêfî ne û têkildarî binpêkirina mafê darizandina adilane nerazîbûnên nîşan didin. Hikûmet jî polîtîkayên xwe yên ewlehiyê yên tund diparêze û dibêje ku di têkoşîna li dijî çeteyan de ev pêngav hewce ne.
Her wiha rêveberiya Bukele sala borî sinorê wextê erka serokatiyê rakir û rê li pêşiya mayîna ser desthilatdariyê ya heta hetayê vekir. Muxalîf balê dikşînin ser otorîterbûna li welêt a her ku diçe zêde dibe.
