Li bajarokê Schrozberg ê li herêma Schwäbisch Hall a eyaleta Baden-Wurttemberg a Elmanyayê, Renûr O. ya 38 salî di encama êrîşa çekdarî de jiyana xwe ji dest da. Hat ragihandin ku bûyer roja Sêşemê saet 11:00’an de li pişt malekê qewimî.
Li gorî daxuyaniya polîsan, hevjînê mêr gule berda hevjîna xwe û wê qetil kir. Gumanbar li cihê bûyerê hatibû binçavkirin, roja Çarşemê derket pêşberî Dadgeha Navçeya Ellwangen. Dadgehê biryara girtinê da û gumanbar wê girtî were darizandin.
Rayedaran diyar kirin ku jin li cihê bûyerê jiyana xwe ji dest da û hat hînbûn ku gumanbar gelek gule bera hevjîna xwe daye.
Yekîtiya Jinên Kurd ên Elmanya (YJK-E) derbarê qetilkirinê de daxuyaniyek nivîskî weşand.
YJK-E: QETILKIRINA JINAN NE BÛYEREKE TAKEKESÎ YE, PIRSEKEKE CIVAKÎ YE
YJK-E’yê qetilkirina dayika sê zarokan Renûr O., a ku ji aliyê hevjîne xwe yê mêr ve li Schrozbergê hat qetilkirin şermezar kir û diyar kir ku qetilkirina jinan ne takekesî ye, pirsgirêkek civakî û pergalî ye.
Di daxuyaniyê de hat destnîşankirin ku polîtîkayên bêcezatiyê û zihniyeta serdest a mêran ku tundiya li dijî jinan gur dike rê li ber qetilkirinên nû vedikin û bal kişand ser zêdebûna tundî û qetilkirina li dijî jinan li Elmanyayê.
YJK-E’yê daxuyand ku qetilkirina jinan divê wekî parçeyek ji şerê civakî ya sedsala 21’an were dîtin û bi bîr xist ku li gorî daneyên Neteweyên Yekbûyî, her 5 deqeyan li çaraliyê cîhanê jinek ji aliyê mêran ve tê qetilkirin.
Di daxuyaniyê de hat destnîşankirin ku ew zihniyeta ku jinan wekî “milkê” mêr dibîne, jinên ku mafên xwe diparêzin û tundiyê red dikin bi mirinê ceza dike û heke ev sûc wekî pirsgirêkek civakî neyên destgirtin, tundî wê asayî bibe û cesaretê dide sûcdaran.
Di daxuyaniyê de hat bibîrxistin ku di sala 2025’an de li Elmanyayê 308 jin ji hêla mêr, hevjîn an endamên malbatê yê mêr ve hatine qetilkirin û ev yek nîşan dide ku ev pirsgirêkek bingehîn e.
Di daxuyaniyê de hat destnîşankirin ku zayendperestî, nîjadperestî û milîtarîzm tundiya li dijî jinan kûrtir dike û jin bi awayekî pergalî rastî tundî, îstîsmar û îstismara kedê tên.
YJK-E’yê bal kişand ser têkoşîna jinan a rêxistinkirî û ev peyam da: “Bêdengiya li dijî kuştina jinan hevkariya sûc e. Jin bi hev re xurt in. Têkoşîna rêxistinkirî jiyanan rizgar dike.”
