Li navçeya Geverê ya Colemêrgê bi deh hezaran kes beşdarî pîrozbahiya Newrozê bûn.
Pîrozbahî li Stadyûma berê ya Cîlo pêk hat û gelek jin û ciwan tevlî bûn.
Girseya gel ku bi kincên xwe yên gelêrî beşdar bû, dirûşm qîriya û li ber muzîkê govend gerand.
Parlamentera DEM Partiyê Oznûr Bartin li pîrozbahiyê axivî û anî ziman ku Kurd li çar parçeyan berxwedaneke hevpar dimeşînin û wê têkoşîna ziman û nasnameyê dewam bike.
Hevserokê Giştî yê DBP’ê Keskîn Bayindir li pîrozbahiyê axivî û diyar kir ku Newroz “Newroza azadiyê” ye û têkoşîna tê dayin gihîştiye qonaxeke girîng.
Bayindir got, “Roj roja Kurdan e. Me berdêlên giran dan û kes nikare pêşî li têkoşîna me bigire; ji ber ku rêberê me heye, Rêber Ocalan heye. Kurd êdî bêstatubûnê qebûl nakin, zextê qebûl nakin. Ti hêz bila li derveyî Kurdan hesabên cuda nekin. Heta ku em azad bibin em ê têbikoşin û li ber xwe bidin. Nîşaneya azadiyê yekîtî ye. Ya ku me rizgar bike jî yekîtiya me ya neteweyî ye. Ev ruh wê azadiya me pêk bîne.”
Endama Meclîsa Dayikên Aştiyê Gulbeyaz Mihçi jî xwest, Newroz bibe wesîleya azadî û aştiyê.
Piştî axaftinan agirê Newrozê hate dadan. Pîrozbahiyê bi stranên Sîpan Xelat û hunermendên xwecihî dewam kir.
