Hat ragihandin ku li Girtîgeha Girtî ya Jinan a Sîncanê tehliyeya girtiyên ku ev demek dirêje girtî ne, ji aliyê Desteyên Îdare û Çavdêriyê ve tê astengkirin.
Li gorî agahiyan tehliyeya Nedîme Yaklav a ku 34 sal in girtî ye 7 caran, ya Hîcran Binîcî ya ku 33 sal in girtî ye û ya xwişkên Nuriye û Devrîm Adet jî yên ku 32 sal in girtî ne 5 caran hate taloqkirin. Tehliyeya Zelîha Ustabaş 4 caran, ya Fatma Aslan û Melîke Goksu jî 3 caran, ya Emîne Abîş a ku ji sala 2021’an ve girtî ye jî 3 caran hate taloqkirin.
Nûnera TUHAD-FED a Enqereyê Sîhan Kaya diyar kir ku ji sala 2021’an ve tehliyeya gelek girtiyan ji aliyê Desteyên Îdare û Çavdêriyê ve tê astengkirin û bang kir ku dawî li vê pêkanînê were û girtiyên ku tehliyeya wan tê astengkirin, bên berdan.
Sîhan Kaya diyar kir ku niha herî kêm tehliyeya 9 jinên girtî tê astenkirin û tehliyeya hin jinan jî 7 car in tê astengkirin.
Rêvebera Şaxa Komeleya Hiqûqnasên Ji Bo Azadiyê (OHD) a Enqereyê parêzer Fatma Surucu jî îfade kir ku astengkirina tehliyeyan tenê li Girtîgeha Sîncanê nîne, li girtîgehên din jî ev yek tê kirin û banga berdana girtiyan kir.
