Bi boneya nêzîkbûna salvegera 26’an a Komploya Navneteweyî ya li dijî Rêberê Gelê Kurd Abdullah Ocalan ku 9’ê Cotmeha 1998’an de li dest pê kiribû, li Helebê meşeke girseyî hat lidarxistin.
Bi hezaran şêniyên taxên Şêxmeqûsd û Eşrefiyê yên Helebê ku dikanên xwe venekiribûn, beşdarî meşa şermezarkirina komploya navneteweyî û pergala êşkence û qirkirinê ya li Îmraliyê bûn.
Şêniyan bi vekirina pankartên “Ji Rêber Apo re Azadî, Ji Pirsgirêka Kurd re Çareseriya Siyasî”, “Em ê komployê têk bibin” û “Wekhevî û biratiya gelan bi ser dikevin” û hildana wêneyên Rêberê Gelê Kurd Abdullah Ocalan ji pêşiya Hola 8’ê Adarê dest bi meşê kir. Di meşê de dirûşmên silavkirina berxwedana Rêber Abdullah Ocalan hatin berzkirin.
Şêniyan ku li kolanên Şêxmeqsûd û Eşrefiyê meşiyan, li pêşiya Navenda Çand û Hunerê ya Cemîl Horo ya li taxa Eşrefiyê sekinin û mîtîngeke li dar xist. Piştî deqeya rêzgirtin hevseroka Meclisa Giştî ya Şêxmeqsûd û Eşrefiyê Hêvîn Silêman û rêveberê Nîvisgeha Rêxistinê ya PYD’ê Welat Mamo axivîn.
Hêvîn Silêman diyar kir ku îradeya gelan li ber hewldanên faşîstan ên bi armanca tarîkirina ramanên Rêberê Gelê Kurd Abdullah Ocalan bûye mertal.
Hêvîn bi bîr xist ku dewletên kapîtalîst bi hevkariya PDK’ê bi dîlgirtina Rêbertî xwestin dawî li têkoşîna wî bînin û got: “26 sal di ser komploya navneteweyî re derbas bûn, armancên komplogeran negihiştin serî.”
Hêvîn bi bîr xistin ku destkeftiyên gelên Bakur û Rojhilatê Sûriyeyê bi dest xistine berhemên ramanên Rêberê Gelê Kurd Abdullah Ocalan in.
Welat Momo jî qonaxên komploya navneteweyî vegot û diyar kir ku çareserkirina pirsgirêka Kurd li Îmraliyê ye.
Mamo got, bi azadkirina fîzîkî ya Rêbertî wê pirsgirêka Kurd û tevahî pirsgirêkên Rojhilata Navîn çareser bibin.
