Xwepêşandanên li Îranê yên ku di 28’ê Kanûna 2025’an de bi kêmbûna qîmeta diravên neteweyî dest pê kirin, bi xwepêşandanên bazirganan a li Bazara Mezin a Tehranê re berfireh bûn û belavî gelek bajaran bû.
Hat ragihandin ku xwepêşanderan li gelek bajaran ku di nav de paytext Tehran jî heye, barîkatan danîne û pevçûnên dijwar bi hêzên ewlehiyê re rû dane. Her çend rayedaran daxuyaniyek fermî li ser hejmara qurbanî û birîndaran nedabe jî, agahiyên ku ji qadê tên nîşan didin ku windahiyên cidî hene.
JIN DI HEDEFÊ DE NE
Hat ragihandin ku di xwepêşandanan de jin rasterast dibin hedef. Hat diyarkirin ku di rojên dawî de, herî kêm 40 jin hatine binçavkirin û gelek jin jî rastî êşkence û muameleya xirab hatine.
Li gorî agahiyên ku ji aliyê Komîsyona Jin a Meclîsa Parastina Neteweyî ya Îranê ve hatine weşandin, hêzên ewlehiyê bi cilên sivîl bi ser wargeha jinan a Zanîngeha Neteweyî ya Tehranê de girtine û karmendên zanîngehê û xwendekarên jin hatine binçavkirin. Her wiha hat diyarkirin ku xwendekarên jin, keçên ciwan û çalakvanên mafên jinan li Îsfahan, Reşt, Huzistan, Kerec û Yasuc hatine binçavkirin û hin ji wan şandine girtîgehan.
Li bajarê Îzehê, nêzîkî 80 kesên ku beşdarî xwepêşandanan bûne hatine binçavkirin ku nîvê wan jin bûn û hat diyarkirin ku van jinan şandine Girtîgeha Ahvazê.
JINEK HAT QETILKIRIN
Jinek 22 salî ya bi navê Sager Etemadî di dema xwepêşandanan de ji ber guleyên hêzên rejîmê bi giranî birîndar bibû û piştre li nexweşxaneyê jiyana xwe ji dest da.
