Bi sedan şêniyên kantona Cizîrê, tevî endamên saziyên sivîl, meclisên leşkerî û Hêzên Ewlekariya Hundirîn sersaxî ji malbatên şehîdan Erdal Wêran Şar (Îbrahîm Kanar), Reşîd Omer, Delîla Dêrsim, şehîd Egîd Serhed, Çiyager Amara û Derwîş Kurdistan xwestin. Sersaxî li Navenda Tevgera Ciwanên Şoreşger a Şehîd Bawer a li bajarê Dêrikê yê kantona Cizîrê hat qebûlkirin û merasîmek hat lidarxistin.
Merasîm bi deqeyek rêzgirtin dest pê kir. Piştre endamê Meclisa Malbatên Şehîdan a Dêrikê Mihemed Şerîf Derwîş axivî û got ku bi saya têkoşîna Rêber Apo û keda şehîdan ewlehî li herêmê çêbûye, mirovahî û gelên herêmê ji zulmê hatine parastin.
Bi navê Hêzên Ewlekariya Hundirîna Herêma Bakur û Rojhilatê Sûriyeyê Dîrok Mele Beşîr jî banga parastina mîrateya ku şehîdan li du xwe hiştiye û domandina rêya wan kir.
Dîrok Mele Beşîr soza domandina têkoşînê û parastina maf û destkeftiyên gelan kir û got, “Pêvajoya heyî hewce dike ku destkeftiyên xwe mîsoger bikin û ta azadiyê berxwedanê bidomînin.”
Merasîm bi berzkirina dirûşman bi dawî bû.
Şervanê QSD’ê Egîd Serhed (Ehmed Omyak) 24’ê Çileya 2025’an di berxwedana Bendava Tişrînê de şehîd bûbû, şervanê QSD’ê Çiyager Amara (Aslan Kutlu) 26’ê Sibatê li Şedadê, Derwîş Kurdistan (Murad Dag) 16’ê Çileya îsal û Erdal Wêran Şar 25’ê Çileyê, şervana YPJ’ê Delîla Dêrsim (Nazan Agirman) jî 11’ê Çileya îsal li Bendava Tişrînê şehîd bûbûn. Endamê Hêzên Ewlekariya Hundirîn Reşîd Miheyedîn Omer jî 20’ê Cotmehê li Reqayê şehîd bûbû.
Cenazeyê şehîd Erdal Wêran Şar û Reşdî Omer duh bi merasîmekê li Pakrewangeha Şehîd Xebat Dêrik hatin veşartin. Di merasîmê de şehîd Delîla Dêrsim, Egîd Serhed, Çiyager Amara û Derwîş Kurdistan jî hatin bibîranîn.
