Cenazeyên şervanê QSD’ê Salih Doşka (Salih Ebdî) û şervanê Hêzên Komandos Birûsk (Mihemed Ebas) ên ku di navbera 20-23’yê Çileya îsal di berxwedana li hemberî êrişên komên hikumeta demkî de li Sirînê şehîd bibûn, îro bi merasîmeke girseyî li Pakrewangeha Şehîd Dîcle ya bajarê Kobanê hatin veşartin.
Ji bo şervanên YPJ’ê Arîn Mîrkan (Emîne Ehmed) û Rûken Botan (Hewa Ogurlu) ên ku 21’ê Çileya îsal li Reqayê û şervanê YPG’ê Egîd Amanos (Eymen Nebî) ê 17’ê Çileyê li Dêr Hafirê di êrişên komên hikumeta demkî de şehîd bûbûn, merasîma xiyabî hat çêkirin.
Merasîm bi deqeya rêzgirtinê dest pê kir. Piştre endama Meclisa Malbatên Şehîdan a bajarê Kobanê Emel Behadîn sersaxî ji malbatên şehîdan re xwest û got, ew ê xeta şehîdan bişopînin û xwedî li destkeftiyên wan derkevin.
Emel got: “Şehîdên me rûmet û hêza me ne. Em ê xeta şehîdan bişopînin û xewn û xeyalên wan pêk bînin.”
Ji rêveberên Meclisa Leşkerî ya bajarê Kobanê Mehmûd Dêmo jî sersaxî ji malbatên şehîdan re xwest û ev tişt anî ser ziman: “Em di qonaxeke pir hesas re derbas dibin. Divê em hêz û berxwedana xwe li hemberî dijmin xurtir bikin da ku em bihigihêjin asta serkeftinê. Berxwedana me bi saya şehîdan didome. Em Kurd in, em hene û em ê her tim hebin. Em soz didin ku em ê heta dawiyê xwedî li mîraseya şehîdên xwe derkevin.”
Piştre nasnameyên 5 şehîdan hatin xwendin û radestî malbatên wan hatin kirin.
Şêniyan cenazeyê şehîd Salih Doşka û Birûsk bi tiliyên dayikan û dirûşma “Şehîd namirin” spartin axê.
