Di du êrîşên bi bombeyî ya li eyaleta Hayber Pahtunhva û di şerê navbera hêzên ewlehiyê û çekdaran de, herî kêm 14 kesan jiyana xwe ji dest dan, zêdeyî 25 kes birîndar bûn. Di nava miriyan de 11 wezîfedarên ewlehiyê û 3 sivîl jî hene. Her wiha 3 kesên çekdar jî di operasyonan de hatin kuştin.
Li gorî rayedaran êrîşa ewilî li navçeya Bajaur pêk hat. Wesayîteke bi teqemeniyan barkirî, li dîwarê medreseyekê ket û înfîlak bû. Di teqînê de 8 polîs û endamên Yekîneyên Sînor jiyana xwe ji dest dan, 10 wezîfedarên ewlehiyê jî birîndar bûn. Bi bandora teqînê re banê hin malên li derdor hilweşiyan û zarokekî jiyana xwe ji dest da. Rayedaran diyar kir ku dibe windahiya can zêde bibe.
Êrîşeke cuda jî li bajarê Bannu pêk hat. Li nêzî nuqteyeke polîsan teqîn çêbû. Di bûyerê de 2 sivîl mirin, 17 kes birîndar bûn.
Li navçeya Shangla jî di operasyonên lêgerînê yên hêzên ewlehiyê de şer qewimî, 3 polîs û 3 çekdaran jiyana xwe ji dest dan. Polîsên eyaletê ragihandin ku kesên hatine kuştin, berê tevlî êrîşên li dijî welatiyên Çînê bûne.
Çîn di salên dawî de bi milyaran dolaran li Pakistanê dirazîne, ev proje dem bi dem dibin hedefa komên çekdar. Di Adara 2025’an de ji ber êrîşeke xwekujiyê 5 endezyar û ajokarên Çînî yên ku di înşaeta bendavekî de dixebitîn, jiyana xwe ji dest dabûn.
