El Şofî yê ku ji ANHA’yê re axivî diyar kir ku agirbest timî ji aliyê “Eşîr û hêzên ewlehiyê” ve tê binpêkirin û ev agahî dan: “Herî dawî roja Îna bihurî li eniya rojava agirbest hat binpêkirin. Eşîr bi çekên navîn ketin herêma Qurbe Necran, êrîşê milkên sivîlan kir û şênî tirsandin, gund talan kirin, şewitandin û teqandin.”
El Şofî, destnîşan kir ku ew girêdayî agirbest û lihevkirinên navdewletî ne û da zanîn ku bi dehan gund wêran bûne û komkujiyên li dijî sivîlan bi belgeyan hatine qeydkirin û got, “Gel û Durzî bi qirkirinê re rû bi rû ne ku bi desteka hêzên ewlehiyê tê kirin” û bang kir ku komên lêkolînê yên navneteweyî binpêkirinên li herêmê di cih de lêkolîn bikin.
Tariq El Şofî, anî ziman ku hêzên wan gelek eniyên şer kontrol kirine û bi domdarî bi odeyên çalakiyên leşkerî yên hevbeş ên Siwêdayê re di nava hemahengiyê de ne.
El Şofî, diyar kir ku dê parastina sivîl û şervanan bidomînin û bang li hêzên navneteweyî kir ku çareseriyeke lezgîn bibînin. El Şofî, destnîşan kir ku ji bo kontrokirina dosyaya ewlehiyê li herêmên wan ew amade ne bi hêzên Koalîsyona Navneteweyî û “dewletên dost” re koordîneyê bikin.
Şerê li Siwêydayê di 13’yê Tîrmehê de bi êrîşa hêzên hikûmeta demkî û komên çekdar ên girêdayî wan li ser herêmê dest pê kir û dema şervanên xwecihî bersiva êrîşan dan, tundî zêde bû. Li gorî SOHR’ê, di encama êrîşan de heta roja îro herî kêm 1568 kesan jiyana xwe ji dest dane.
