Li ser banga Federasyona Komeleyên Ciwanên Sosyalîst (SGDF) ji bo 33 qurbaniyên Komkujiya Pirsûsê ên ku di 20’ê Tîrmeha 2015’an de li navçeya Pirsûsê ya Rihayê di êrîşeke xwekujî ya bombeyî de jiyanan xwe ji dest dan, li Kolana Halîtaga ya navçeya Kadikoyê ya Stenbolê merasîma bîranînê hat lidarxistin.
Gelek nûnerên ji partiyên siyasî, saziyan, sendîkayan, platforman û rêxistinên ciwanan beşdarî bîranînê bûn. Di bîranînê de wêneyên kesên jiyana xwe ji dest dane hatin hilgirtin û pankarta “Bila dilê me ji bo edaletê lê bide” hat hilgirtin. Di bîranînê de dirûşmeyên “Edalet ji bo Pirsûsê, edalet ji bo hemûyan”, “Wê hesabê Pirsûsê were bê hilanîn” û “Amed, Pirsûs, Enqere hesab bipirsin” hatin berzkirin.
Hevjînê Nazegul Boyraz a ku di Komkujiya Pirsûsê hat qetilkirin, Bayram Boyraz di bîranînê de axivî û diyar kir ku nêzîkî 11 sal in ji bo edaletê têdikoşin û got, “Em ne xemgîn in. Em ê xemgîn nebin. Ew bi ken çûn û em ê mîna wan berxwedêr bin.”
Bavê Ezgî Sadet a ku di komkujiyê de jiyana xwe ji dest da, Alî Sadet diyar kir ku daxwaza edaletê ji bo hemû civakê derbasdar e û got, “Ger hesabê Roboskî û Sêwasê bihata pirsîn wê Pirsûs çênebûya. Ger hesabê Pirsûsê hatiba pirsîn wê Enqere çênebûya. Em ji bo edaletê li vir in.”
Di axaftinan de banga hevrûbûna Komkujiya Pirsûsê hat kirin. Her wiha daxwaza edaletê û darizandina berpirsyaran hat kirin.
