Qada petrolê ya kete destê HPL li herêma Kordofanê, li ser sînorê Sûdan a Başûr e.
Endezyarekî qadê ji AFP’ê re axivî û anî ziman ku tîmên teknîkê hilberandina rawestandine, navend girtine û xebatkarên wê ji bo Sûdan a Başûr hatine veguhestin.
Navenda xebitandina petrola Sûdan a Başûr jî hate girtin. Wezareta Enerjiyê ya Sûdanê li ser mijarê hîn daxuyanî nedaye.
Qada Heglig yek ji navendên herî krîtîk e ku piraniya îxracata petrola Sûdan a Başûr dike û ji hatineya bingehîn a hikumeta Juba ye.
Meha Cotmehê piştî ku paramîlîteran tevahiya Darfur bi dest xistin, herêm veguherîbû qadeke girîng a stratejîk.
BI DEH HEZARAN KES MIRIN, 12 MILYON MIROV JI CIH Û WARÊ XWE BÛN
Di heman demê de li herêma Kordofanê ji ber êrişên bi droneyan ên paramîlîteran windahiyên mezin rû dan. Rêxistina Tenduristiyê ya Cîhanê (RTC) diyar kir ku 4’ê Kanûnê li Kalogiyê êriş li ser dibistaneke destpêkê û nexweşxaneyekê hate kirin û di encamê de 114 kesan jiyana xwe ji dest dan, 63 ji wan zarok bûn. Her wiha 35 kes jî birîndar bûn.
Şerê ku Nîsana 2023’an destpê kir bû sedema mirina bi deh hezaran kesî, koçberiya 12 milyon mirovî û hilweşîna binesaziya tenduristiyê ya welêt.
RTC’ê ragihand ku îsal li tevahiya Sûdanê li hemberî 63 navendên tenduristiyê êriş hatin kirin, 1.611 kes hatin ukştin û 259 kes jî birîndar bûn.
