Li herêmên cuda yên Sûriyeyê di 24 saetên dawîn de, bûyerên ewlehî yên cuda rû dan. Li gundewarên rojavayê Humsê ciwanek hat kuştin, li gundewarên rojhilatê Helebê di encama teqîna bermahiyên şer de zarokekî jiyana xwe ji dest da, li gundewarên Efrînê di navbera 2 komên girêdayî Wezareta Parastinê ya Sûriyeyê de pevçûneke çekdarî derket û li gundewarên rojhilatê Dêrazorê jî pevçûneke eşîran bi awayekî dijwar çêbû.
Li herêma El Qebo ya gundewarên rojavayê Humsê ciwanek (24) ku li kargeheke çandiniyê kar dikir, piştî ku ji cihê xebata xwe hat revandin, di encama gulebarankirinê de hat kuştin.
Li bajarê Dêr Hafir ê gundewarên rojhilatê Helebê zarokek ji ber birîna xwe ya di encama teqîna bermahiyên şer de, jiyana xwe ji dest da.
Li gundewarên Efrînê di navbera 2 komên girêdayî Wezareta Parastinê ya Sûriyeyê ya li derdora gundê Kokana ya girêdayî navçeya Mabeta de pevçûneke çekdarî derket, hejmarek ji kesan birîndar bûn û hinek ji wan hatin girtin.
Li gundê El Riz ê gundewarên rojhilatê Dêrazorê di navbera eşîra El Ikêdat de pevçûneke bi çekên giran derket, heta niha jî gulebarana di navbera wan de didome. Li gorî agahiyan ev bûyer ji ber bûyereke ku beriya niha derketiye û di encamê de kesek hatibû kuştin, careke din rû daye.
