Li Bendava Tişrînê ku îro wek bendava berxwedanê tê binavkirin, ev 59 roj in ji aliyê gel û şervanên QSD û YPJ’ê ve berxwedanek bêhempa tê meşandin. Li gel vê komên çand û hunerê yên jinan jî beşdarî berxwedana li Bendava Tişrînê dibin.
Di têkildarî vê berxwedanê û girîngiya çand û hunerê de endama Koordînasyona Hîlala Zêrîn a Bakur û Rojhilatê Sûriyeyê Mizgîn Çolaq ji ANF’ê re axivî.
‘BENDAVA TIŞRÎN JI BO GELÊ SÛRIYEYÊ JIYAN E’
Mizgîn Çolaq da zanîn ku ev zêdetirî 50 roj in li Bendava Tişrînê gel berxwedanek dîrokî raber dike û wiha axivî: “Ji sala 2016‘an ve me di hunerê de şoreşek çêkir. Ji bo ku em vê şoreşê tevî destketiyên wê biparêzin, me kefenê mirinê qetand û jiyan bi berxwedanê ava kir. Mînaka vê ya herî ber bi çav jî berxwedana dîrokî ya Bendava Tişrîne ye. Dewleta Tirk a dagirker ji bo herêma Bakur û Rojhilatê Sûriyeyê dagir bike berê xwe daye Bendava Tişrînê. Rojane bi çekên giran û balafiran dixwaze berxwedana şervanên QSD û YPJ’ê bişikîne. Di heman demê de ev Bendav ji bo gelên herêma Bakur û Rojhilatê Sûriyeyê û temamiya Sûriyeyê çavkaniya jiyanê ye. Bi rêya vê bendavê elektrîk, ava vexwarinê, ava çandiniyê û avhewaya paqij derbasî herêmê dibe. Ji ber wê gel ev yek qebûl nekir û ji bo parastina xak û aboriya xwe berê xwe da Bendava Tişrînê.”
‘ARMANCA DEWLETA TIRK GUHERTINA DEMOGRAFÎK E’
Mizgîn Çolaq berxwedana şervanên QSD û YPJ’ê silav kir û got, ew çavkaniya hêzê ne û wiha pê de çû: “Em berxwedana şervanên QSD û YPJ’ê ji dil silav dikin û ev berxwedan ji bo me cihê serbilindiyê ye. Wekî tê zanîn em îro di nava şerê cîhanê yê sêyemîn de ne. Şerekî normal nîne û yekser li ser gelên Bakur û Rojhilatê Sûriyeyê jî tê meşandin. Di vî şerî de herî zêde dijmin felsefeya, ‘Jin, Jiyan, Azadî’ kiriye hedef. Ji ber vê jî bi rojane pêşengên jinên azad dike armanc. Dewleta Tirk a dagirker ji gelek aliyan ve êrîşî me dike. Di armanca vî şerî de guhertina demografîk û çandî heye. Dewleta Tirk a dagirker naxwaze gelê Kurd xwe bi xwe rêvebibe. Destkeftiyên gelê Kurd ji bo xwe wek metirsiyek dibîne. Em ê nehêlin ku dewleta Tirk bigihîje armanca xwe.”
‘DIXWAZE HÊZ Û ÎRADEYA GEL BIŞIKÎNE’
Mizgîn Çolaq got, gel tenê ji bo ava xwe biparêze naçe Bendava Tişrînê û wiha berdewam kir: “Li gel vê dixwazin bi şervanên xwe re bi hev re li ber xwe bidin. Gel dema ber bi Tişrînê ve bi rê dikeve, bi çand û hunera xwe re diçe û li ser bendavê çanda xwe bi dîlan, stran û tilîliyan tînê ziman. Dewleta Tirk dema vê dibîne yekser bi balafiran êrîşî gel dike û komkujiyan pêk tîne. Ev jî nîşan dide ku dewleta Tirk têk çûye û bi hedefgirtina gel re dixwaze vîna wan bişkêne û teslîm bigire. Em dikarin bi çand û hunerê li dijî dijmin serî hildin. Mirov dikare bi destekî çek, destekî jî tembûr rake. Ev me xurtir dike. Em êdî bi govenda azadiyê re berxwe didin û têdikoşîn. Em bi coşek mezin berê xwe didin Bendava Tişrînê. Lewre em ji mirinê natirsin, wek dayîk ji dibêjin, ’em ji mirinê mezintirin.’ Em ê heta dawiyê li Bendava Tişrînê nobeta azadiyê bigirin. Ji ber ku ax û welatê me, rûmet û hebûna me ne.”
‘EW NIKARIN BERXWEDANA JINÊ TÊK BIBIN’
Mizgîn Çolaq bi bîr xist ku dema rejîma Baasê desthilat bû, tenê yek al, yek ziman, yek çand ferz dikir û ev yek anî ziman: “Bi hatina Rêveberiya Xweser a Demokratîk re ev yek ji holê rabû û bi felsefeya xwişk û biratiya gelan û pergala hevserokatiyê jiyanek azad hate avakirin. Lê belê bi hatina Colanî re dixwazin careke din rejîma Baasê li gelan ferz bikin. Bi taybet jî ev yek li ser jinê tê ferzkirin, da ku jin jiyanê qut bibe. Dixwazin carekê din jin bixin bin desthilatdariya mêran. Lê ew nikarin berxwedana jin têk bibin.”
‘DEWLETA TIRK ROJANE JIN Û SIVÎLAN QETIL DIKE’
Mizgîn Çolaq wiha dawî li axaftina xwe anî: “Em wek jinên Tevgera Hîlala Zêrîn û jinên ji herêma Efrîn-Şehba hatine li vê herêmê xwe bi cih dikin. Me ji Kantona Cizîr heta Bendava Tişrînê bi hev re nobet girt. Nobeta me ya jinan heta dijmin bi temamî têk biçe wê li bendava Tişrînê her bidome. Em wek jinên Hîlala Zêrîn bang li tevahî rêxistinên mafê mirovan dikin û bila peywîra xwe ya mirovî pêk bînin. Dewleta Tirk a dagirker rojane zarok û jinan qetil dike û dixwaze bi van erîşan çavkaniya jiyana me dagir bike. Em ê bi berxwedana jinê ya çand û hunerê dijmin têk bibin.”
