Hevşaredarê berê yê Bajarê Mezin ê Amedê Selçûk Mizrakli rojek piştî berdanê li navçeya Baglar a Amedê serdana Goristana Yenîkoyê kir.
Mizrakli destpêkê serdana gora dayika xwe Leman Mizrakli û gora bavê xwe Mahmûd Nedîm Mizrakli kir. Piştre jî serdana gora malbata Hevşaredarê berê yê Amedê Osman Baydemîr û Dr. Îlhan Dîken kir. Misrakli her wiha serdana gora Serokê berê yê Baroya Amedê Tahîr Elçî jî kir.
Selçûk Mizrakli kesên jiyana xwe ji dest dan bi bîr anî û anî ziman ku afirandina aştî û çareseriyê berpirsyariya bingehîn a siyasetê ye. Mizrakli got, mirina ciwanan di şer de tê wateya serneketina siyasetê.
Mizrakli anî ziman ku li Tirkiyeyê derî li serdemeke nû vebûye ku wekhevî, demokrasî, azadî û hiqûq lê serwer be û hêvî kir ku demeke welê bê ku ciwan jiyana xwe ji dest nedin, mirov netirsin û nekevin nava fikarên li ser paşerojê.
Mizrakli her wiha serdana gora Mehdî Zana jî kir. Tê payin ku li Goristana Şehîtlîkê serdana gorên Vedat Aydin û Tahîr Demîrtaş û serdana Goristana Mardînkapiyê bike.
