Li Şîlî, bi hejmartina ji sedî 99’an zêdetir a dengan, parlementerê berê yê muhafazakarê tundrew José Antonio Kast bû serokomar. Kast ji sedî 58,16 ê dengan girt, lê berbijara çepgir û Wezîra Xebatê ya berê Jeannette Jara di ji sedî 41,84 de ma.
Kast, ku kampanyaya xwe li ser zêdebûna bêewlehî û koçberiya ne bi rêkûpêk ava kir, bi soza xwe ya dersînorkirina bi deh hezaran koçberên bêbelge derket pêş.
Kast di axaftina xwe ya serketinê de got, “Yê ku li vir bi ser ketiye ne kesek an jî partiyek e, Şîlî ye.” Kast anî ziman ku ew ê li dijî sûc û bêserûberiyê “têkoşîneke tund” bimeşînin.
Kampanyaya hilbijartinê ya Kast, ku ji Trump îlhama xwe girtibû, planek pêk anîbû ku avakirina navendên binçavkirinê, dîwarên pênc metreyî yên bilind, têlên bi elektrîk û xendekên sê metroyî yên kûr û her wiha zêdekirina hebûna leşkerî, bi taybetî li bakur, li ser sînorê Perû û Bolîvyayê, di nav xwe de digirt.
Ji aliyê din ve, serokomarê heyî Gabriel Boric, ji Kast re telefon kir û ragihand ku pêvajoya derbasbûnê dê dest pê bike.
Analîst encamê wekî beşek ji rabûna rastgir li Amerîkaya Latînî dinirxînin û destnîşan dikin ku ne xwedîderketina Kast li ser piraniya teqez a li kongreyê, dibe ku rêveberiya wî zehmet bike.
