Bîranîn li ser gorên wan ên li Goristana Deriyê Harranê ya li navçeya Eyyubiyeyê pêk hat. Bîranîn ji aliyê KAT-DER’ê ve hat lidarxistin û endamên malbatê û nûnerên rêxistinên civaka sivîl û partiyên siyasî yên bajêr beşdarî çalakiyê bûn.
Bernameya bîranînê bi deqeyek rêzgirtinê ji bo kesên ku di têkoşîna azadî û demokrasiyê de jiyana xwe ji dest dane destpê kir. Hevjîna Muhsîn Melîk, Senay Melîk, di bîranînê de axivî û got: “Em bi êşa xwe ya ku 32 sal in kêm nebûye li vir in. Hevjînê min ê delal, Muhsîn Melîk ku tenê sûcê wî parastina gel bû, di 2’yê Hezîrana 1994’an de li navenda bajarê Rihayê ji aliyê dijminên mirovahiyê ve bi hovane hat kuştin.”
Senay Melîk anî ziman ku armanca herî mezin a Muhsîn Melîk ew bû ku hemû derdorên cuda yên li van axan dijîn li ser bingeha hemwelatîbûna wekhev bi awayekî mirovî bijîn û got: “Ew her tim ji bo vê dozê têkoşiya. Tevî ku her tim dihat şopandin û tehdîtkirin jî, ew bi berpirsiyarî û hesasiyeta rewşenbîrekî li kêleka gelê xwe, mexdûr û bindestan sekinî. Hemû hewldanên wî yên di jiyanê de parastina tiştê rast bû.”
Senay Melîk got: “Hişyarî û wêrekiya gel dijminên demokrasiyê tirsand, hêzên tarî ku nekarîn wan bitirsînin, xwestin ku vî kurê wêrek ê gelê Kurd ji holê rakin û ramanên wî tune bikin. Lê şehîd namirin. Ew bi ramanên xwe û tiştên ku ji bo pêşerojê dihêlin dijîn. Îro, xewn, raman û hêviyên Muhsîn her tim bi me re ne. Bi hezaran Melîk Muhsîn li deştên Mezopotamyayê bi heman ramanê dijîn.”
Hevserokê DEM Partiyê yê Rihayê Nîhat Demîrbîlek jî got ku ew şopdarên rêya wan a heqîqetê ne.
Piştî bîranîna li ser gora Muhsîn Melîk, girse ber bi gora Mehmet Yildiz ve çû. Li vir jî soza domandina têkoşînê hat dayîn.
Bîranîn bi dirûşmeya “Şehîd namirin” bi dawî bû.
