Dorpêçkirina giran a li ser bajarê Kobanê û zêdebûna koçberên ji herêmên cuda sîstema tenduristiyê aniye ber hilweşînê. Rêveberiya Nexweşxaneya Miştenûr, hişyarî da ku ger şert û mercên heyî berdewam bikin, nexweşxane dê di nav sê rojan de ji xizmetê derkeve.
Yek ji Rêveberên Nexweşxaneya Miştenûr Dr. Evîn Xelîl, diyar kir ku nexweşxane, bi beşên xwe yên zarokan, jinan, psîkolojiyê û tenduristiyê yên giştî, rojane bi navînî xizmetê dide 450 nexweşan, ku ev hejmar bi hatina koçberan re sê qat zêde bûye.
Dr. Evîn Xelîl, destnîşan kir ku derman û pêdiviyên bingehîn bi lez xilas dibin û da zanîn ku zarok û jinên ducanî ji ber şert û mercên zivistanê, hewaya sar û kêmbûna sotemeniyê di xetereyek mezin de ne.
Dr. Evîn Xelîl, anî ziman ku bi hezaran koçber di şert û mercên dijwar de li dibistan û kolanan dijîn û bi lezgînî daxwaza rakirina dorpêçê û gihandina dermanan kir.
