UNHCR û IOM’ê ragihandin ku du keştiyên ku piraniya rêwiyên wan penaberên Rohingya bûn û di dawiya meha Hezîranê de ji eyaleta Rakhine ya Myanmarê bi rê ketibûn, noqî avê bûne.
Li gorî Neteweyên Yekbûyî (NY), keştiya yekem ku nêzî 250 kes tê de bûn, piştî derketina rê agahî jê nehat girtin. Tê texmînkirin ku keştiya duyem jî ku nêzî 280 kes tê de bûn, di 8’ê Tîrmehê de li peravên herêma Ayeyarwady ya Myanmarê binav bûye.
Berpirsan, dan xuyakirin ku ev bûyer û hejmara qurbaniyan hîn bi fermî nehatine piştrastkirin, lê fikarên mezin hene ku di her du karesatan de zêdetirî 500 kesan jiyana xwe ji dest dabe.
Li gorî daneyên UNHCR’ê, di sala 2025’an de li bakurê Okyanûsa Hindî nêzî 900 penaberên Rohingya bûne qurbanî an jî winda bûne. Her wiha hat ragihandin ku zêdetirî 6 hezar û 500 Rohingyayî ji bo bigihîjin Malezya û Endonezyayê ketine ser rêyên deryayî yên xeternak.
UNHCR û IOM’ê, her wiha da zanîn ku ji serê salê vir ve, li Deryaya Andaman û Kendava Bengalê nêzî 300 kesên din jî ku ji penaberên Rohingya û welatiyên Bangladeşê pêk tên winda bûne an jî jiyana xwe ji dest dane.
Saziyên NY’ê hişyarî dan ku rêwîtiyên deryayî yên li derveyî demsala asayî, ji ber baranên musonê û lehiyên li herêmê, rîsk û xetereyan hîn mezintir çêdikin.
